-Almmuhus-
OĐĐASATEambbo vearrodienas fylkkagildii

Eambbo vearrodienas fylkkagildii

-

-

Finnmárkku fylkkagielddas lei 9 miljovnna eambbo vearrodienas go maid ledje rehkenastán.

Diimmá jagi vearrorehketdoallu lea gárvvis, ja dat čájeha ahte Finnmárkku fylkkagielddas lei 9 miljovnna eambbo vearrodienas go maid bušeahtas ledje rehkenastán.

Fylkkaráđđeolmmái Øystein Ruud lea hui duhtávaš.

– Čájeha ahte Finnmárku ovdána buoret guvlui. Go vearrodienas lassána, de šaddá suohkaniidda eambbo doaibmafriddjavuohta, lohká Ruud preassadieđáhusas.

 

Bušeahttalassáneapmi

Ruud muitala ahte hálddahus lei ovdal juo oaidnán ahte vearrodienas sáhttá šaddat eambbo go maid ledje bušehttii bidjan. Juovlamánus loktejedje bušeahtas dan logu golmmain miljovnnain.

– Mis lei sávaldat ahte galggai lassánit eambbo juovlamánus, muhto eat lokten eambbo, lohká son.

Vearrodienas ja dienasdássen lassánii 6,2 proseanttain diibmá, jus buohtastahttá 2015 loguiguin. Vearrodienas lea sullii 450 miljovnna ruvnno jahkái.
Diibmá lei suohkansuorggis obbalaš vearrodienas 1,55 miljárdda ruvnno eambbo go stádabušeahtas lei meroštuvvon.

-Almmuhus-