6,6 proseantta ohppiin lohket hárddáhallat guktii dahje golbmii mánnui, dahje vel dávjjit. Dat lea 0,3 proseantta lassáneapmi 2016 ektui.
Oahppit vástidit ahte leat eará oahppit, rávisolbmot skuvllas dahje oahppit neahta bokte geat leat givssidan. Badjelaš 435 000 oahppi serve ohppiidiskkadeapmái.
Eai goassege ovdal leat nie ollugat searvan dán jearahallamii, dieđiha Oahppodirektoráhtta preassadieđáhusas.
Eambbogat dieđihit givssideami
– Ohppiin lea riekti oadjebasvuhtii ja buori skuvladillái. Mii váldit ášši hui duođas go oahppit muitalit iežaset givssiduvvon. Lea bargu mii ii ábut bisánit, ja buohkat geat barget ohppiiguin galget diehtit movt galget čoavdit ášši ja veahkehit vai ohppiin lea buorre ja oadjebas dilli skuvllas, lohká Oahppodirektoráhta direktevra Hege Nilssen.
Borgemánu 1.beaivvi rájes doaibmagođii ođđa njuolggadusmearrádus, mii nanne ohppiid rivttiid.
Skuvllat leat geatnegahtton čađahit doaimma vai ohppiin lea buorre dilli skuvllas, ja oahppit sáhttet dieđihit Fylkkamánnái jus skuvla ii bargga doarvái bures áššiin.
– Fylkkamánnit leat ožžon 563 dieđiheami givssideami birra dan rájes go skuvla álggii čakčat. Dat sáhttá muitalit ahte njuolggadusmearrádus doaibmá, ja lea álkidan Fylkkamánniin váldit oktavuođa oažžut veahki givssidanáššiin. Dat lea dehálaš lávki rievttes guvlui, dadjá Hege Nilssen.
Rávisolbmot eai diehtán dan birra
Leat ain ollu rávisolbmot geat eai dieđe givssidemiid birra.
40 proseantta lohke ahte rávisolbmot eai diehtán maidege givssideami birra. 16,4 proseantta vástidii ahte skuvla diđii givssideami birra, muhto ii bargan maidege.
Dát logut leat seamma diibmá go ovddit jagi.
Iskkadeapmi
Rievdadusaid dihte ohppiidiskkadeamis eai sáhte buohtastahttit bohtosiid ovddit jagiid ektui.
2016:s vástidedje 6,3 proseantta ahte givssiduvvo guktii dahje eanet gerddiid mánus.
Ohppiidiskkadeapmi lea geatnegahttojuvvon čađahit 7.luohkás, 10.luohkás ja joatkkaskuvllas nuppi jagi. 5.luohkáhasat sáhttet maid searvat iskkadeapmái jus háliidit.
