-Almmuhus-
OĐĐASATEambbo mánát ožžot mobiltelefovnna

Eambbo mánát ožžot mobiltelefovnna

-

-

Mediabearráigeahču logut čájehit ahte eanet ja eanet mánát ožžot mobiilatelefovnna. 

87 proseantta gaskal 9–11-jahkásaš mánáin lea smarttelefovdna. 2014:s lei dát lohku 67 proseantta. 

Measta bealli 9- ja 18-jahkásaččain geavahit telefovnna guokte diimmu dahje eambbo beaivvis. 

– Oaidnit ahte eanet ja eanet mánáin lea smarttelefovdna, ja dat geavahit dan olu. Barn og medier -iskkadeamis 2018:s dieđihit mánát ieža ahte iežaset mielas geavahit maid beare olu telefovnna, lohká Mediabearráigeahču direktevra Mari Velsand.

 

Moitet iežaset telefovdnageavaheami

Njealji jagis, 2014:s gitta 2018 rádjái lea mobiilageavaheapmi lassánan. Dalle lei 67 proseantta 9–11-jahkásaččain smarttelefovdna. Dál lea 87 proseantta mánáin dan agis smarttelefovdna. Gaskal 12–14-jahkásaš mánáin lea maid lassánan, 90 proseanttas 97 prosentii. Buot 15–16-jahkásaš mánáin lea smarttelefovdna. 

45 proseantta gaskkal 9-ja 18-jahkásaččain oaivvildit ieža ahte geavahit beare olu áiggi telefovnnas, sosiála mediain ja obbánássinge neahtas.  Dat lohku lea lassánan 2016 rájes. Nieiddažat moitet dan eambbo go bártnážat. 

Mađi boarráseabbon šaddet, dađi eambbogat moitet maid iežaset geavaheami.

 

Áigegeavaheapmi vuođđun nákkuide

Badjelaš bealli 9–18-jahkásaččain lohket ahte dávjá diggojit váhnemiiguin áigegeavaheami birra.

Mediabearráigeahčču čállá ahte sisdoallu, dahje maid mánát barget neahtas, ii leat nu stuora áššin, baicce man guhká leat neahtas. 

– Dát sáhttá mearkan ahte váhnemat beroštit eambbo das man olu áiggi mánát bidjet telefovdnii, ii ge maid duođai barget neahtas. Mediabearráigeahčču oaivvilda ahte sisdoallu berre leat dehálaš oassi váhnemiid ja mánáid gulahallamis, lohká Mari Velsand.

– Rávisolbmot sáhttit veahkkin oadjebassan dahkat mánáid digitála eallima. Lea dehálaš mánáide ja nuoraide veahkkin bidjat rájiid das mii lea dohkálaš, lohká Velsand.

-Almmuhus-