Olbmot leat oaidnán ahte ii lean dušše dat okta goddi mas lei čolton GPS-gilkor. NINA váldá dál vihtta gottis eret dákkár gilkora.
Olbmot leat oaidnán ahte ii lean dušše dat okta goddi mas lei čolton GPS-gilkor. NINA váldá dál vihtta gottis eret dákkár gilkora.
Hoahppočoahkkimis mearridedje Biebmobearráigeahčču, Birasdirektoráhtta ja Norgga Luonddudutkaninstituhtta (NINA) váldit eret GPS-gilkoriid gottiin main dat lei čolton.
NINA oaivvilda ahte eai leat nu vearrát, muhto eai áiggo geahččaladdat, dieđiha NINA iežaset neahttasiiddus.
Iskan gilkor-elliid
Aurlándda várrestivrra bearráigeahččit ledje oaidnán daid gottiid bearjadaga. NINA lei sin bivdán ohcat daid gilkor-elliid, ja iskat leat go gilkorat čolton. Dan dat ledje.
Maiddái Stáhta Luonddubearráigeahčču (SNO) searvvai de bearráigehččui, ja godde ovtta gotti mas lei čolton gilkor.
Ieža báhcet
– Mii leat digaštallan ášši Biebmobearráigeahčuin, geat bearráigehččet geahččalan-elliid elliidčálggu. Leat maid digaštallan ášši Birasdirektoráhtain, mii eaiggáduššá dán prošeavtta. Mii leat gávnnahan ahte fertet váldit eret GPS-gilkoriid. Vaikko elliin ii leat rievdan láhtten, de fertet rehkenastit ahte ferte oba unohas. Lea stuora várra ahte čoalttut šaddet vel losibun ja stuorábun. Dan eat hálit, lohká NINA veterineara Bjørnar Ytrehus. Gilkoriin lea dakkár funkšuvdna ahte sáhttet dušše guođđilit dan sáddenrusttega.
Muhto jus sii eai nagot oažžut daid gilkoriid čoavdašuvvat, de fertejit báhčit elliid.
Lasihit bearráigeahču
NINA lasiha bearráigeahču buot sajiin gos gottiin leat GPS-gilkorat.
Leat dušše guktii ovdal ná olu jikŋon dákkár GPS-gilkorat. Norggas leat sullii 400 gottis leamaš dákkár gilkorat. Dutkit jáhkket ahte lea dálki mii lea dagahan jiekŋuma, go njuoska áibmu lea ja vuollegis temperatuvrrat.
– Ii leat dat ovdal leamaš váttisvuohtan. Danne leat gulahallan buvttadeddjiiguin, vai gávdnošii sivva, ja vai eastadivččii dán boahtteáiggis. Radiosáddenrusttegat Norggas fertejit gierdat garra dálkkiid. Juste dáid gilkoriid eat áiggo šat geavahit, lohká Ytrehus.
Boazodoalus maid geavahit seamma sádden rusttegiid, ja eai leat registrerejuvvon váttisvuođat daiguin.
