Duorastaga lei vuosttaščájáhus musihkkavideos «Sámi You’ll Never Walk Alone» Álttá kulturviesus. Mánnodaga, dahje Sámi álbmotbeaivvi almmuhuvvo video nehttii ja olles máilbmái. Ulbmil lea olahit nu olu olbmuid go vejolaš.
2015:s riegádii jurdda jorgalit Liverpool spábbačiekčanjoavkku lávlaga sámegillii, ja dál leat gergosat čájehit dan olles máilbmái.
Go jurdda lei riegádan, de váillui dušše bargagoahtit dainna. Vaikko lea spábbačiekčanlávlla, de dat lea olu eará maid:
– Mun in ipmir spábbačiekčamis maide, ja ledjen álggos veahá eahpesihkkar háliidan go searvat dasa. Muhto mearridin loahpas ahte searvvan, ja lea leamaš hui somá, lohká musihkkaproduseanta Klemet Anders Buljo.
Ii dušše spábbačiekčanlávlla
Musihkkavideo lea filbmejuvvon sihke Finnmárkkus ja Liverpoolas.
Videos deaivvadit maid iešguđetlágan olbmot ja kultuvrrat.
Earret eará boahtá ovdan dat lihkohisvuohta mii dáhpáhuvai Hillsborough spábbačiekčanšiljus cuoŋománu 15. beaivvi 1989:s, go 96 olbmo masse heakka.
Dasa lassin dubmehallo Liverpool čuvodeaddjit sivalažžan dán dáhpáhussii.
– Liverpool ii leat dušše máilmmi buoremus spábbačiekčanjoavku, muhto sin lávlla lea maid hui erenoamáš, mii dagahii ahte válljiimet dan jorgalit sámegillii. Dat ii leat dego eará spábbačiekčanlávlagat, lohká rešissevra Magne Pettersen.
– Musihkkavideos boahtá ovdan earret eará dat lihkohisvuohta, mii šattai hui erenoamáš midjiide. Danne go justte dan áiggi go mii filbmiimet Liverpoolas diibmá, áššehuvve Liverpool čuvodeaddjit, olu jagiid maŋŋel dáhpáhusa.
(Ášši joatká gova vuolábealde)
Duhtavaš geahččit
Ledje boahtán olu olbmot geahččat musihkkavideo, eai ge lean behtohallan.
– Filbma lei hui erenoamáš, ja hui bures ráhkaduvvon. Dovdo ahte lea olu bargu filmma duohken, ja vaikko lea spábbačiekčanlávlaga musihkkavideo, de dás boahtá ovdan nu olu eará go dušše dat. Erenoamáš historjá muitaluvvon videos, geahččit lohke hui duhtavačča.
(Ášši joatká gova vuolábealde)
Stuora mihttu
Vaikko video ii leat vuos almmuhuvvon, de lea filbmadahkkin stuora mihttu.
– Go filbma almmuhuvvo mánnodaga, de lea mihttu olahit badjel čuođiduháha geahčči vuosttas jándoris. Vai dan galgat nagodit, de ferte video juhkkot hui máŋgii. Ulbmil lea geahččalit oažžut Liverpool FC facebookjoavkku juohkit min video. De gal leat duhtavaččat, lohká Pettersen.
– Mu mielas ii leat čuođi duhát eahperealisttalaš, go dan gal jáhkán nagodit. Ja doaivvun maid olahit mihttu, lávlaga čuojahuvvot Anfield:s, Liverpool ruovttušiljus, loahpaha son.