Luoddajohtolatguovddáš (VTS) várre olbmuid, ollu sávzzat ja bohccot guhtot luottaid lahka ja mannet tuneallaide čoaskudit.
– Mii oažžut geasset measta beaivválaččat dieđuid elliid birra mat leat luottaid lahka dahje luottaid alde. Ja dál go báhkat bohtet, de dát eallit dávjá mannet tuneallaid sisa čoaskudit. Dan dihte sáhttet várálaš dáhpáhusat dáhpáhuvvat tuneallaid siste dahje juste olggobealde, dadjá Siril Veiåker Nilsen Luoddajohtolatguovddáža davvi regiovnnas, preassadieđáhusas.
Miehtá Davvi-Norgga dieđihuvvojit eallit luottaid alde, ja maŋemus beivviid de lea VTS ožžon dieđuid čorragiid birra Fálesnuori šaldi alde ja Storvika-tuneallas, Álttás. Dasa lassin go sávzzat leat riikkageaidnu 80 alde, Tørresvikas, Nordlánddas.
– Mii ávžžuhit johtaleddjiid johtit várrogasat, ja leat earenoamáš áicil báikkiin gos lea merkejuvvon ahte eallit sáhttet leat luottaid alde. Ii leat álo nu álki fuobmát elliid mat guhtot luoddaguorain, ja danne lea buorre vuolidit leahtu veaháš, dadjá Nilsen.
Dieđit politiijaide dahje eaiggádii
Juohke jagi vuojáhallet ollu eallit luottaid alde. Johtaleaddjit leat geatnegahtton veahkehit elliid mat leat roasmmehuvvan dahje dárbbašit veahki. Jus lea sáhka biebmoeallis dahje meahcieallis man ii sáhte veahkehit, de galgá dieđihit eaiggádii dahje politiijai.
