Gaskavahkku almmuhii FeFo geat ožžot bivdit gos. Dán jagi leat veahá unnit bivdoguovllut go diibmá.
Gaskavahkku almmuhii FeFo geat ožžot bivdit gos. Dán jagi leat veahá unnit bivdoguovllut go diibmá.
Gaskavahkku almmuhii FeFo dán jagáš ealgavuorbádeami bohtosiid. Dán jagi vuosttaš geardde čađahuvvui sihke ohcan ja vuorbádeapmi digitálalaččat.
– Dán jagi ledje 286 bivdoguovllu almmuhuvvon, dat lea veahá unnit go diibmá, dalle leadje 295. Dasa lassin leat guokte guovllu mat leat várrejuvvon oahpahusbivdui, čállá Finnkárkkuopmodat FeFo preassadieđáhusastis.
Dáppe gávnnat listtu.
11 proseantta nissonat.
FeFo oaččui ohcamušaid 383 bivdojoavkkus, dát lea veahá eanet go diibmá, dalle ohce 375 joavkku. Dán jagi dattege ohce olu unnit joavkkut go 2013:s, dalle ohce 488 joavkku.
Oktiibuot 2 054 bivdi leat registrerejuvvon joavkkuide. Dát lea veahá eanet go diibmá, dalle ledje 1 987 bivdi.
– Gaskamearálaš bivdiidlohku juohke ohcamis lea lassánan maŋimuš jagiid. Dán jagi ledje 5,4 bivdi juohke joavkkus, 2013:s ges ledje 4,6 bivdi. Vuollelaš 11 proseantta dáin leat nissonat, sullii seamma lei diibmá ge, čállá FeFo
Ohcan máŋgga guvlui
Máŋga joavkku leat ohcan máŋggat guvlui beassat bivdui.
– Okta bivdojoavku lei ohcan 115 guvlui, čállá FeFo.
Guovlu 6-Valjohka ja 18- Iešvárri Kárášjoga gielddas, leat bivnnuhepmosat. Goappáge guvlui ledje 165 ohcamuša.
99 joavkku vuordinlisttus
Nu mo ovddit jagiid, de ledje 2016: maid olu eambbo ohcamat go bivdoguovllut. Danne gárte 99 bivdojoavkku vuordinlistui, diibmá ledje 85 joavkku listtus.
– Listu lea veahá guhkit dán jagi, go ledje eambbo ohccit ja unnit guovllut go diibmá. Muhto moatte jagi áigi lei vuordinlistu olu guhkit, 2013:s ledje 216 listtus ja 2014:s 131 joavkku.
Dain joavkkuin, mat leat bajimusas vuordinlisttus, lea buorre vejolašvuohta oažžut bivdoguovlluid mat eai leat vel juhkkon, dahje maid eará joavkkut eai hálit. Dál leat njeallje bivdoguovllu mat ain leat rahpasat.
