-Almmuhus-
-Almmuhus-
OĐĐASATEalgabivdo­moivi Guovda­geainnus: – Dušše guovtti olbmo gaska­vuohta

Ealgabivdo­moivi Guovda­geainnus: – Dušše guovtti olbmo gaska­vuohta

-

-

Guovdageainnu suohkana várresátnejođiheaddji gohčoda ealgabivduášši moivvi dušše guovtti olbmo gaskavuohtan, ii ge juoga mii lea suohkana dahje ealgabivdosearvvi moivi.

Ikte čálii Ávvir ášši go Guovdageainnu suohkana ealganállejoavkku jođiheaddji ja Guovdageainnu ealgabivdiidsearvvi jođiheaddji leaba riiddáskan. 

Loga maid:
Oalát suhtadan ealggaid dihte

Isak Ole J. Hætta čohkká goabbatbealde beavddi dán áššis, go son lea Guovdageainnu suohkana várresátnejođiheaddji ja maid Guovdageainnu ealgabivdiidsearvvi nubbejođiheaddji.

Gaskavuohta

Hætta ii loga dan ášši duohtavuođas oba leamen ge áššin Guovdageainnu suohkana ja ealgabivdiidsearvvi birra, muhto guovtti olbmo birra geain leat gaskavuođat.

– Mu mielas lea dát ášši čuožžilan go guokte olbmo eaba soabat ovdalii go ahte Guovdageainnu suohkan ii fuola ealgabivdiidsearvvi mielde FeFoi ealganállemeroštallančoahkkimii. Dás lea sáhka ahte guokte olbmo eaba soabat man nu ášši geažil, lohká son.

– Maid das oaivvildat?

– Na suohkana bealis ii galgga vuostevuohta leat váldit ealgabivdiidsearvvi mielde čoahkkimii, ii ge leat ovttasbargohástalus ge leamašan, lohká son.

Eai mearrádusat dan ektui

Hætta lohká iežas diehtit ahte ealgabivdiidsearvvi bealis ii leat leamašan ášši dan ektui ahte go eai oaččo sierravuodjinlobi. Son lohká maid diehtit, go lea várresátnejođiheaddji, ahte ii leat mihkkege suohkana bealis vuostevuohta ealgabivdiidsearvvi váldit mielde čoahkkimii.

– Mu dieđus ii galgga suohkanis dakkár mearrádus makkárge dásis dahkkon ahte suohkanis ja ealgabivdiidsearvvis ii leat ovttasbargu, lohká son.

– Lea go dat suohkana almmolaš oaidnu ahte ealgabivdiidsearvi ii galgga mielde dan čoahkkimii?

– Dat ii leat meannuduvvon, ii ge mearriduvvon gostege,  ii ge de leat suohkana almmolaš oaidnu, lohká son.

– Lea go dat ealgabivdiidsearvvi oaidnu ahte Vegard Olsen, gii lea suohkana áirras ealganállemeroštallančoahkkimis ja maid sierravuodjinlohpelávdegotti jođiheaddji, ii galgga addán sierravuodjinlobi ealgabivdiidsearvai go doarju ealgasuollagiid?

– Dat leat dušše ovttaskas olbmo čuoččuhusat, dán oktavuođas ealgabivdiidsearvvi jođiheaddji, Per Nils Saari. Mii eat leat mearrádusaid dahkan dan ektui, eat leat gieđahallan ge dakkár ášši searvvis, ii ge mis leat dakkár ášši leamašan ságastallamis ge searvvis. Nu ii leat dat ealgabivdiidsearvvi almmolaš oaidnu, lohká son.

Gulahallat

Hætta lohká ahte go orru leamen dušše guovtti olbmo gaskavuohta, de son oaidná dárbbu ságastallat dan birra, ja čielggadit áššiid.

– Mun oainnán ahte mis várra lea dárbu čohkkedit oktasaš čoahkkimii ja formaliseret movt galgá doaibmat bargu dan olis. Nu guhká go eai leat makkárge gaskavuođat searvvi ja suohkana gaskkas, de in oainne mun dán áššis makkárge hástalusaid duođi eambbo, lohká son.

Ii mearrádus

Guovdageainnu suohkanis leat dakkár meahcástanáššiid ovddasvástádus Kultuvrra, ealáhusa ja teknihkalaš váldolávdegottis leamaš juovlamanu 18. beaivvi 2021 rájes fapmudus. Dan jođiha  Klemet Erland Hætta.

Son ii loga sis váldolávdegottis oba leamašan ge ságas dakkár ášši mas ii galgga Guovdageainnu ealgabivdiidsearvi leat mielde.

– Mii eat leat dahkan dakkár mearrádusa. Mu mielas lea dát ášši eambbo guovtti olbmo gaskavuođaid birra. Mu mielas galggašeigga baicca soai juhkat gáfe fárrolaga ja čorget áššiid vai sudno gaskavuođat eai galgga báidnit bargguid maid ealgabivdiidsearvi ja suohkan barget ovttas, lohká son. 

ČORGET: Guovdageainnu suohkana Kultuvrra, ealáhusa ja teknihkalaš váldolávdegotti jođiheaddji, Klemet Erland Hætta, ávžžuha gulahallat ja čorget áššiid. Govven: Nils Johan Vars (vuorkágovva)
ČORGET: Guovdageainnu suohkana Kultuvrra, ealáhusa ja teknihkalaš váldolávdegotti jođiheaddji, Klemet Erland Hætta, ávžžuha gulahallat ja čorget áššiid. Govven: Nils Johan Vars (vuorkágovva)

– Lea go din váldolávdegottis addon fápmudus earáide doaimmahit ealganállemeroštallanáššiid suohkana ovddas?

– Mis ii leat dakkár mearrádus dahkkon, lohká son

– Manin de Vegard Olsen lea dat gii jođiha dán barggu suohkana ovddas?

– Son lea fuođđolávdegotti jođiheaddji leamašan dalle go dat lei doaimmas. Dál ii leat dat doaimmas šat. Dan olis son lea de maid daid áššiid jođihan suohkana ovddas dalle. Mun in dieđe manin dat bovdehus lea eaŋkiláirasiidda mannan FeFo bealis, go rievtti mielde lei galgat suohkanii mannat, lohká son.

– Nu Vegard Olsenii ii leat addon fápmudus rievtti mielde ahte son lea suohkana áirras čoahkkimis?

– Min váldolávdegottis ii leat dakkár mearrádus dahkkon, lohká Klemet Erland Hætta.

-Almmuhus-