Sosialisttalaš Gurutbellodat (SG) bovde odne čoahkkimii Guovdageainnus. Ulbmil lea cegget listtu čavčča suohkanválggaide ja guhkitáiggi mihttu lea olahit Sámediggái.
Sosialisttalaš Gurutbellodat dáhtu ealáskahttit báikkálaš searvvi Guovdageainnus. Odne eahkedis bovdejit čoahkkimii ja doaivva lea čohkket dan mađe olbmuid ahte besset searvat Guovdageainnu suohkanválggaide.
– Áigumuš lea ásahit listtu ja seavat čavčča válggaide. Guovdageainnus leat eanet bellodagat go eará guovlluin, danin lea hástalus beassat suohkanstivrii. Min sávaldat lea juobe ovtta mandáhta ge oažžut suohkanstivrii, lohká SG fylkkajođiheaddji Tommy Berg.
Jámas 2007:a rájes
Guovdageainnu SG searvvai maŋimuš suohkanválggaide 2003:s, dalle ožžo ovtta áirasa suohkanstivrii. 2007:a rájes leamaš báikkálaš SG jámas Guovdageainnus.
– Mii jáhkkit Guovdageainnus oallugiid doarjut Sosialisttalaš Gurutbellodaga, dasa lassin lea bellodahkii dehálaš oidnon ja gullot maiddái sámi guovlluin. Áigumuš lea maiddái háhkat eanet oahpu sámevuođa birra, čilge Berg. SG:s lea báikkálaš searvi sámi gielddain Unjárggas ja Porsáŋggus, dasa lassin leat bargamin dan nammii ahte ásahit báikkálaš bellodaga Detnui.
Sámediggái
Sosialisttalaš Gurutbellodat dáhtu boahtte Sámedikkeválggaide maid cegget listtu. Báikkálaš bellodat ásaheapmi Guovdageainnus lea vuosttaš lávki Sámediggái.
– Lea dehálaš ahte bellodagas lea váikkuhanfápmu buot cehkiin politihkas, danin háliidat Sámediggái maid beassat. Livččii gelddolaš jus muhtin guovdageaidnulaš ovddasta SG vuohččan Sámedikkis, muitala Berg.
SG gievrrat davvin ja máddin
SG ii leat beare nanus riikkadásis ja njiedjá válgaiskkademiin. SG Finnmárkku jođiheaddji ii heađástuva dáinna ja muitala ahte ná leamaš ovdal ge, bellodat dattege álo čuožžila ja sidjiide lea dehálaš beassat eret Bargiidbellodaga suoivvanis.
– Báikkálaččat lea dehálaš gávdnat moadde dehálaš ášši ja duođaid bargat dáid ovdii. Justa dál jáhkkán SG gievrrat Davvi-Norggas ja máddin, Álttás láve bellodat álo beali gievrrat go SG lea riikkadásis, muitala Tommy Berg.
Seamma olu listtut
Sosialisttalaš Gurutbellodagas lea maiddái áŋgiruššan «Ja til Nord-Norge», áigumuš lea ásahit lassi báikkálaš bellodagaid. Prošeavtta jođiheaddji Terje Håkstad lohká iežaset lihkostuvvat Finnmárkkus.
– Mis dáidet seamma olu listtut Finnmárkkus go ovddit suohkanválggaid oktavuođas ledje, kánske lassánit vel jus cegget listtu Guovdageainnus. «Ja til Nord-Norge» prošektii lea hui dehálaš sámevuođa ovddidit, min áigumuš lea ahte mii davvin galgat ieža hábmet iežamet boahtte áiggi, lohká Håkstad.
Maiddái dán prošeavtta birra muitalit otná čoahkkimis Guovdageainnus.
