-Almmuhus-
-Almmuhus-
-Almmuhus-
VALÁŠTALLANEalas Álttás dán vahkku

Ealas Álttás dán vahkku

-

-

Ovdal go beanaráiddut vulget Finnmárkkuduoddarii, de besse muhtun guossit geahččalit vuodjit beatnagiiguin go Álttá guovddážis lei šovvavuodjin. Geahča video áššis.

Finnmarksløpet oktavuođas leat stuora doalut ja hui eallin Álttás olles vahkku. Olbmot vázzet, biillat vudjet, beatnagat cillet, musihkka ja biepmohádja čilge hui bures makkár Álttá guovddážis lei odne gaskabeaiáigge.

 

Šovvavuodjin

Ovdal go beanavuodjingilvvut álget ihttin, de besse muhtun guossit otne geahččalit čohkkát reagas ja vuodjit beatnagiiguin. Beanaráiddut bohte maŋŋálaga, ja vudje  gávpotguovddáža čađa, vai olbmot besse oaidnit sihke beatnagiid ja vuddjiid.


Beanaráiddut manne maŋŋálaga Álttá guovddáža čađa. Govven: Inger Marita Bals

 

Biepmohádja

Vaikko beanavuodjin lea váldodáhpáhus dán vahkku, de dáhpáhuvvá hui olu eará maid. Doppe lea vejolaš oastit feara makkár biepmuid. Earret eará haksui guollehádja guhkás. Biepmotealttás lea maid vejolaš oastit bohccobierggu, dan gii dasa liiko.

Duojárat ja earát leat maid boahtán vuovdit iežaset gálvvuid. Náhkkegahpirat, ullobiktasat, liinnit, duoljit, láselihtit ja viessočiŋat leat dušše ovdamearkkat makkár diŋggaid dáppe sáhttá gávdnat.


Guossohit olbmuide luosa maid olgun leat bassán. Govven: Inger Marita Bals

 

Suohttasat mánáide maid

Doalut leat heivehuvvon buohkaide, mánáide maid. Vaikko dál eai soaitte buot mánát nu áŋgiruššat beanavuodjimis, de lea olu eará maid sii sáhttet dáppe fuobmát. Earret eará hukset viesu. Go Ávvir váccašii geahččame, de ledje olu mánát juo veahkkin hukseme unna visoža.


Mánát hukseme unna visoža. Govven: Inger Marita Bals

 

Beanaráiddut vulget ihttin

Ihttin diibmu 11:s lea vuolgga Álttá guovddážis. Sihke FL-1000, FL-500 ja FL-junior.

 

 

-Almmuhus-