-Almmuhus-
OĐĐASATEaláhusdolliid vearrodieđihan áigemearri lahkona

Ealáhusdolliid vearrodieđihan áigemearri lahkona

-

-

Birrasiid bealli dan 320 000 olbmos geat galget sáddet ealáhusdolliid vearrodieđáhusa, leat jo dahkan dan. Dat geat eai leat vel geargan galget sáddet dieđáhusa Altinn neahttasiidui maŋimustá gaskaijaáigge maŋŋebárgga miessemánu 31. beaivvi.

Dán jagi rájes galget buot ealáhusdoallit sáddet vearrodieđáhusa oktan mildosiiguin, elektronalaččat Vearroetáhtii. Ealáhusdoallit fertejit maid muitit sáddet vearrodieđáhusa, vaikke vel eai leačča ge rievdadeamen das maidege.

Sáddenluvven, mii guoská dábálaš vearromáksiide ja penšunisttaide, ii guoskka oainnat ealáhusdolliide, čállá Vearroetáhta preassadieđáhusastis.

– Eatnašat leat elektronalaččat sádden jo máŋga jagi, muhto bábirskovis lávket elektronalaš sáddemii lea hástalus muhtimiidda. Mii háliidat bures juohkit dieđuid ja láidestit erenoamážit sin neahta ja telefuvnna bokte, dadjá Mariken Holter guhte lea gulahallandirektevra Vearroetáhtas.

 

Sáhtát facebookas oažžut veahki

Skatteetaten.no siiddus leat olu dieđut ja maiddái veahkki oažžumis. Jus it gávnna dan maid dárbbašat doppe, de sáhtát čuojahastit ja telefuvnna bokte oažžut veahki.

Dasa lassin lea Vearroetáhta almmuhan facebooksiiddu ovttaolbmofitnodagaid várás, man leat gohčodan «Skatten min bedrift».

Doppe sáhtát jearrat gažaldagaid ja oažžut vástádusaid, ja maiddái oaidnit maid earát leat jearran.

– Eai buohkat dieđe ahte leat ožžon ealáhusdolliid vearrodieđáhusa. Ovdamearkka dihte sáhttá olmmoš heaittihan iežas fitnodatdoaimma ja álgán dábálaš bálkábargin. Jus leat ožžon ealáhusdolliid vearrodieđáhusa, de fertet logget Altinn siidui ja doppe sáddet dan sisa, lohká Holter.

 

Álkidan deavdima

Vearroetáhta almmuhii dán jagi ođđa ja álkit čovdosa sidjiide geain leat iežaset fitnodat ja geat ieža rapporterejit, dan gohčodit «Næringsrapport skatt».

Dán bálvalusa sáhttet smávva oasusfitnodagat ja ovttaolbmofitnodagat, mat eai rapportere fágavuogádagaid bokte, geavahit. Nu eai galggaše ádjánit seamma guhká deavdit skoviid go ovdal.

– Ealáhusdoallit galget rapporteret vearrodili birra elektronalaččat. De lea dušše riekta ahte mii dahkat sidjiide álkibun deavdit skoviid riekta, dadjá Mariken Holter.

Ovttaolbmofitnodagat fertejit joatkit vearrodieđáhusain maŋŋil go leat deavdán «Næringsrapport skatt», divvun dihte persovnnalaš loguid ja sádden dihte daid. Oasusfitnodagat leat geargán sáddemiin go leat sádden dan «Næringsrapport skatt» skovi.

 

Ealáhusdoallit sáhttet ohcat guhkiduvvot áigemeari. Dan fertejit dahkat ovdal miessemánu 31. beaivvi.

 

 

 

-Almmuhus-