Gaskaijarocka mii lea okta Davvi-Norggá stuorámus festiválain dárbbaša olu vehkiid go galgá lágiduvvot. Eaktodáhtolaš bargit leat dehálaččat lágideamis, muitala Elisabeth Joks gii lea váktan bargan Gaskaijarockas.
Olu olbmot leat bargan eaktodáhtolažžan dán vahkkoloahpa Gaskaijarockas sihke čorgejeaddjin, dearvvašvuođaveahkkin, billeahtavuovdin dahje nu go dát golmmas, váktan.
Váktabargu
Váktatealttas ledje čohkohallame Elisabeth Joks, Roald Joks ja Tove Merete Johnsen.
– Mii ovddastit Nordlys Kyokushin Karateklubb Álttas. Min bargu lea sihkarvuohta nu ahte mii leat vávttat dás siskkaldasat Gaskaijarockas ja lávddi lahka.
Dehálaš bargu
Sin mielas lea dehálaš bargat eaktodáhtolažžan, nu ahte sáhttet lágidit dakkár stuora doaluid.
– Vaikko dát lea stuora festivála, de jáhkan ahte livčče gártat oba divrrasin jus galggašii bálkáhit buohkaid geat dáppe barget.
Geahččalit nu bures go sáhttet
Eatnasat gal láhttejit čábbat, vaikko muhtinat gal sáhttet dieđusge dagahit veahá váttisvuođaid. Olbmot leat buori mielas, ja nu leat ge mii maid. Mii geahččalit goit veahkehit buohkaid nu bures go sáhttit, lohka Elisabeth Joks.
