-Almmuhus-
OĐĐASATEai vuolgge čáskadit jus buollá Kárášjogas

Eai vuolgge čáskadit jus buollá Kárášjogas

-

-

Jus Kárášjoga gielda ja gieldda buollindoaimmahat eai šatta ovttaoaivilii, de eai leat gielddas buollinčáskadeaddjit maŋŋel boahtte sotnabeaivvi.

Kárášjoga buollindoaimmahat lea cealkán eret šiehtadusa Kárášjoga gielddain, ja maŋŋel sotnabeaivvi 24. beaivvi ođđajagimánus eai leat geatnegáhtton vuolget čáskadit jus mihkkege buollá gielddas.

Šiehtadus:

Sierrašiehtadus galgá ovdánahttit báikkálaš buollin- ja gádjunbálvalusa nu ahte sáhttet čoavdit geatnegáhtton servodatdoaimmaid. Dát šiehtadus gohčoduvvo SFS 2404, ja dan mielde sáhttet sierrašiehtadusat dahkkot maiddái báikkálaččat.

 

Báikkálaš sierrašiehtadusaide sáhttet lasihuvvot bealit mat eai leat mielde váldošiehtadusas, mii guoská olles riikii. Kárášjoga báikkálaš sierrašiehtadussii sáhttá de lasihit osiid nu mo motovraliggenrusttebuhtadusaid ja eará buhtadusaid mat dárbbašuvvojit erenoamážit dáppe.

 

Dákkár beliid dat Kárášjoga buollindoaimmahusas váillahit šiehtadusas.

 

Moivi

Buollindoaimmahaga luohttevašolmmoš Kai Jøran Mienna muitala leat máŋga siva dasa go leat cealkán eret šiehtadusa.

– Báikkálaš sierrašiehtadus mii mis lea dál gielddain, lea beare heittot, go das leat ollu buhtadusat váldon eret. Nubbi ášši lea go mis eai leat jođiheaddjit ja muđui lea unnán mii doaibmá albma ládje. Mii oaidnit buot manná nu issoras njozet gieldda bealis, ja ollu mii livčče galgan dáhkkot ii dáhkko, lohká son.

 

Árvvoštallet heaitit

Mienna muitala leamaš oktavuođas gielddain, ja ožžon vástádusa ahte ii mihkkege dáhkko ovdal ođđa buollinhoavda virgáduvvo boahtte mánu.

Son mieđaha ahte eretcealkin lea cuigehus gildii ahte sii oaivvildit dán duođas ja gielda ferte oažžut leahtu njulget boasttuvuođaid.

– Dat lea prinsihpalaš ášši midjiide, ja jus ii buorrán dilli de vaikko árvvoštallat cealkit eret virggiid, ja dat gal gárta baicca divrrasin gildii jus 16 buollinčaskadeaddji heitet ja šaddet gávdnat earáid sin sadjái, lohká Mienna.

 

Ii leat ožžon dieđu

Kárášjoga gieldda teknihkalaš jođiheaddji Trygve Nilsen lohka sii eai leat ožžon dan dieđu ahte buollindoaimmahat eai leat geatnegáhtton vuolgit čáskadit jus buollá.

– Vaikko sii leatge ieža cealkán eret šiehtadusa gielddain, de ii leat addon munnje dat diehtu ahte gielddas ii leat šat buollingearggusvuohta. Mu dieđu mielde leat geatnegáhtton čáskadit buollimiid. Gulán easka dál Ávviris ahte buollindoaimmahagas oaivvildit nu, danne in sáhte spekuleret álgit das, lohká son.


Kárášjoga gieldda teknihkalaš hoavda Trygve Nilsen. Vuorkágovva: Inga Marie Guttorm

Mieđiha moivvi

Moaitámuššii ahte buot manna nu njozot Kárášjoga gielddas, de lohká Nilsen ahte buollinossodat gielddas ii leat doaibman, ja čakčat lei bearráigeahčču ossodagas mii buvttii mearkkašumiid, ja gielda lea bargan daid boastavuođuid njulget.

– Buohkat dihtet ahte diet ossodat ii leat doaibman maŋemus jagiid, ja mii leat maid dal bargame oažžot sadjái ođđa buollinhoavdda gildii. Dálá hoavda celkii eret virggistis skábmamánus ja mii leat dan rájes čađahan proseassaid gávdnat ođđa hoavdda. Mis leat juo  jearahallan ohciiguin, ja ođđa hoavda galgá leat sájis farggamusat, lohká Nilsen.

-Almmuhus-