Vaikko boahtte jagi stáhtabušeahtas sihkastuvvo ruhtadoarjja eret Gaske-Nøørjen Saemienskovlei Aarbortes, de lea sis ain doaivva ahte skuvla gáddjojuvvo.
Vaikko boahtte jagi stáhtabušeahtas sihkastuvvo ruhtadoarjja eret Gaske-Nøørjen Saemienskovlei Aarbortes, de lea sis ain doaivva ahte skuvla gáddjojuvvo.
Mánnodaga šadde ovttasbargobellodagat ráđđehusas ovttaoaivilii boahtte jagi stáhtabušehttii. Nu movt bušeahttaárvalusas mii bođii árabut dán čavčča, de sihkkojuvvo Gaskka-Norgga sámeskuvla, Gaske-Nøørjen Saemienskovle Aarbortes doarjja ollásit boahtte jagi rájes.
Hirpmahuvvon
Skuvlla rektor Bjørn Erik Davidsen lohká vaikko bušeahttaárvalusas juo evttohuvvui sihkkut sin, de lea son goitge hirpmahuvvon.
– Leat leamaš ollus geat leat bargan daid politihkalaš bellodagaid ektui, ja mii leimmet ožžon signálaid Gurutbellodagas ja Risttálaš álbmotbellodagas ahte sii áigo mannat bušeahttašiehtadallamiidda dainna vuolggasajiin ahte bisuhit doarjaga Gaske-Nøørjen Saemienskovlei. Danne lea veaháš hirpmahuhttii, muhto ollislaččat orroge ahte sámi doaimmat eai vuoruhuvvo, lohká Davidsen.
Šaddet heaittihit
Gaske-Nøørjen Saemienskovle lea organiserejuvvon nu ahte lea stáhta fitnodat, ja leat ožžon jahkásaččat gávcci milliuvnna doarjaga. Seastindihti 3,3 milliuvnna, de sihkastuvvo olles doarjja.
– Mii leat leamaš hui duhtavaččat ortnegiin, muhto jus šaddá nu ahte ii boađe doarjja boahtte jagi, de heaittihuvvo skuvla boahtte skuvlajagi rájes, lohká Davidsen.
Eai oalát vuollánan
Davidsen muitala sii dieđusge leat behtohallan dál ja sii dovdet dál hui fámuhisvuođa, muhto sii eai goitge leat vel oalát vuollánan.
– Mii dorvvastit vel Stuoradikki oahpahuslávdegoddái mii galgá juovlamánus buktit iežaset mearrádusevttohusa, ovdal go mearrádus dáhkko, lohká son.
Vuorkágovva: Astrid Helander
Dihtet dehálašvuođa
Sámediggeráđđi Silje Karine Muotka, gii lea Sámedikki oahpahusa ovddasvástideaddji, lea ovttaoaivilis Davidsenain, ahte maŋemus sátni ii leat daddjon vel dán áššis
– Bušeahtta ii leat vel áibbas gárvvis ovdalgo Stuoradikki oahpahuslávdegoddi lea gieđahallan dan, ja mus gal lea doaivva ahte skuvla bisuhuvvo. Mus lea doaivva danne go bellodagat dihtet man dehálaš dat skuvla lea, ja stáhtabušeahtas lea vejolaš máhttokapihttala siskkobealde sirdit ruđaid, lohká Muotka.
Vejolaš sirdit ruđa
Muotka lohká muđui stáhtabušeahtas ii leat nu positiiva sámi doaimmaide, earret go preassadoarjja sámi aviissaide.
– Dieđusge lean behtohallan ja lea šállošahtti go eai luoikka beallji Sámediggai ja eai udno sámi servodaga ovdánit. Muhto nu movt mun oainnán de ii leat dasge loahppaboađus gárvvis, ja lea ain vejolaš smávva divodemiid dahkat ja luvvet ja sirdit ruđa sámi doaimmaide. Dat lea geavvan ovdal, ja sáhttá dál maid geavvat, lohká son.
