-Almmuhus-
OĐĐASAT– Eai soaitte doarvái «sexygat»

– Eai soaitte doarvái «sexygat»

-

-

Sámediggi ii beakke riikkamediain vaikke leat ge oaivegávpogis. NRK Sámi ođasredaktevra ii imaš dan.

– Dat ii leat mihkkege ođđasiid ahte eai oidno, dahje ahte riikkamediat eai gozit Sámedikki vaikke dat lea ge parlameantta, álbmot válljejuvvon orgána. Muhto mun jáhkán dat vuolgá olu das go dat eai oainne dan relevánssa, sámediggi ii leat nu dehálaš sin journalistalaš árgabeaivvis, nubbi soaitte leat dat ahte sámediggi ieš ii nagot gaskkustit dieđuid dan birra maid sii barget. Eai soaitte leat doarvái sexygat, lohká Rávdná Buljo guhte lea NRK Sámi ođasredaktevra.

 

Sámedikkis lea dál dievasčoahkkin Stuorradikkis ja nu lea maid lagabus riikkamediaid, liikká sámi parlameanta ii áktánasat vuhtto riikkamediaid ođasgovas.

– Jus riikkamediat čuvoše mielde ovdamearkka dihte dan Aud Marthinsena ja Ovddádusbellodaga debáhta ahte Sámedikki galggašii heaittihit, de han sis livččii varra dat áššin, muhto dat dieđusge ii leat dat mii lea dehálaš, oaivvilda Buljo.

 

Vaikke eanaš riikkamediat eai čájet ge beroštumi de NRK ođasprográmma «Dagsrevyen» čájehii ikte eahkes reportáša sámedikki dievasčoahkkima birra.

– Muhto dat ahte stuorra riikkamediat eai beroš, earret go NRK, dat ii leat mihkkege erenoamážiid. Dat lea sihke gelbbolašvuođas sáhka ja beroštumis, jáhkká Buljo.

 

– Eai oro nagodeamen čilget

Son oaivvilda ahte livččii dehálaš ahte sámi parlameantta oidnošii maid riikkamediain:

– Dieđusge, oainnat dat vuhtto veahá hástalussan sámi servodagas nagodit čilget ovdamearkka dihte man dehálaš Sámediggi lea, ahte mis lea álbmot válljejuvvon orgána, ja ahte sámediggi lea okta dain mii dáhkida ahte sámegiella, sámi kultuvra ja sámi servodat ahtanuššá ja seailluhit daid, čilge Buljo.

 


II LEAT OVTTAOAIVILIS: Silje Karine Muotka
Govven: Berit Marie Lise Eira

Jáhkká sin leat oidnosis

Sámediggeráđi Silje Karine Muotka ii leat gal ovttaoaivilis dasa ahte Sámediggi ii leat oidnosis stuorraservodaga mediain.

– Na mus gal ii leat dat oaidnu. Mu mielas lea boahtán hui bures ovdan, mun oidnen ikte reportáša Dagsrevyenis ja mun dieđán dat lea fásta institušuvdnan olu Norgga ruovttuin. Doppe lei fiinna reportáša, mii bovttii dovdduid ja mun dieđán dat lea hui dehálaš jus galgá boktit fuomášumi ja ipmárdusa. Nu ahte mun jáhkán dat lea buorre ja jáhkán mii leat oidnosis dáppe gávpogis, lohká Muotka.

-Almmuhus-