-Almmuhus-
OĐĐASAT– Eai sáhte gieldit homovihahemiid Guovdageainnus

– Eai sáhte gieldit homovihahemiid Guovdageainnus

-

-

Guovdageainnu searvegodderáđđi áigu giddet buot golmma girku suohkanis vai homofiillat eai beasa vihahuvvot girkus.

Guovdageainnu searvegodderáđi mearrádus miessemánu 19. beaivvi lea vuosttaš dákkár mearrádus mii lea dahkkon Norggas maŋŋel go Girkočoahkkin mearridii hábmet liturgiija homofiillaid vihaheapmái, čállá Dagen.

 

Ii okta ge vuosttaldan

Guovdageainnu searvegodderáđđi lea mearrádusas hirpmahuvvan go Girkočoahkkin lea dohkkehan homofiillaid vihahemiid, ja sii deattuhit ahte dat mearrádus ii leat Biibbala čielga sániid mielde ja ferte gohčoduvvot vearreoahppan mii biđge girku.

Maŋŋel ipmilbálvalusa Guovdageainnu girkus mannan sotnabeaivvi lágiduvvui girkočoahkkin gosa 41 girkomanni bohte dain čuođis geat ledje ipmilbálvalusas. Doppe lohke jitnosit searvegodderáđi mearrádusa, ja jerrui olbmuin dorjot go mearrádusa.

Girkoverdde Jan Ole Buljo dieđuid mielde ii leat okta ge gii vuosttaldii searvegodderáđi mearrádusa, čállá Dagen.

 

Ii sáhte eará ortnet go Norgga girkus

Davvi-Hålogalándda bisma Olav Øygard lohká ahte searvegoddi ii sáhte giddet girkuid vai homofiillat eai beasa girkus vihahuvvot.

– Lea olu mii lea ortnegis searvegodderáđi mearrádusain. Sii sáhttet suovvat bargiid mearridit iežaset ovddas dán áššis, ja sáhttet ávžžuhit báhpaid garvit náitimis seamma sohkabeliid. Sii ožžot maid bismmaid sihtat jorgalit oainnus, deattuha Øygard.


Davvi-Hålogalándda bisma Olav Øygard. Govven: Astrid Helander.

Øygard lohká searvegotteráđit sáhttet leat vuostá girkolaš homovihahemiid, muhto eai sáhte gieldit dakkár vihahemiid suohkana girkuin.

– Sii eai sáhte ráhkadit earálágan ortnega go Norgga girkus lea jo ortnet, ja dat guoská maid Guovdageidnui. Danne šaddá mearrádus dušše oaidnun, ja cealkka mas lohket ahte eai dohkket seamma sohkabeliid vihaheami iežaset girkuin, lea girkoortnega vuostá, dadjá bisma Dagenii.

-Almmuhus-