Sámedikkeráđđeláhtu Silje Muotka lohká ahte ii leat ávki eretcealkit jienastuslogus.
Sámedikkeráđđeláhtu Silje Muotka lohká ahte ii leat ávki eretcealkit jienastuslogus.
Ávvir lea geahččalan oažžut ságáide Sámedikki presideantta Aili Keskitalo, oažžun dihte Sámedikki oainnu go sámedikki várreláhttu Janoš Trosten lea proteastas geassádan eret Sámedikki jienastuslogus.
Keskitalo lea luomus ja čujuha sámedikkeráđđeláhtui Silje Muotkai vástidit.
Ráŋggášta sámedikki
Silje Muotka lohká eretcealkit iežas jienastuslogus dieđusge lea persovnnalaš ášši, muhto son ii oainne ávkki politihkalaččat dan dahkat.
– Mun in jáhke stáhta ja ráđđehus álget rievdadallat lágaid ja meannudit daid eará ládje, dušše danne go soames cealká jienastuslogus iežas eret. Dáinnalágiin ráŋggášta baicca Sámedikki, iige stáhta, lohká son.
Ovttas earáiguin šaddá gievrat
Muotka oaivvilda eretcealkin lea boasttu guvlui bargat, go de ii leat mielde váikkuheame.
– Sámediggi ii dušše gulahala Ráđđehusain, muhto maiddái hukse alliansaid ovttas earáiguin, ovdamearka dihte ruvke vuosttildeddjiiguin, ja sáhttá gievrrat šaddat váikkuhit, lohká son.
Guhká rahčan
Muotka lohká sámi servvodagas leat dál ollu hástaleaddji áššit, mat eai čovdojuvvo nu jođánit go háliidivčče.
– Leat ovdal maid leamaš hástaleaddji áššit, ja ferte muitit ahte leat buolvvat ovdalis leat ráhčan sámi áššiid ja servvodaga ovddas. Ovdamearka dihte lei 50 jagi dušše niehku ahte sámiin galggai leat iežaset álbmotválljejuvvon orgána, mii dál lea juo doaibman 25 jagi, lohká son.
Ávvir lea jearran márkanis olbmuiguin leat go sii ieža árvvoštallan eretcealkit jienastuslogus, nu movt Janoš Trosten, ja maid sii oaivvildit sámedikki barggu birra, dat mii guoskka sámi vuoigatvuođaide, nu guolásteapmái, bivdui, boazodollui ja árbevirolaš meahcásteapmái.
(Ášši joatká gova vuolábealde)
(Ášši joatká gova vuolábealde)