Finnmárkku fylkkamánni ii addán lobi doallat skohtermáđijaid guhkit rabasin.
Guovdageainnu suohkan lei ohcan fylkkamánnis lobi doallat skohtermáđijaid rabas go giđđa lea ain nu dálvvas.
Miessemánu 15. beaivve bođii vástádus fylkkamánnis.
Fylkkamánni meannudii ohcama ja boađus das lei ahte ii leat vejolaš guhkidit skohtermáđijaid maŋŋel miessemanu 17. beaivvi. Dat mearkkaša ahte suohkan ii ožžon guhkiduvvot skohtermáđijaid miessemanu 24. beaivvi rádjai, nugo ledje ohcan.
Na čuočču suohkana neahttasiiddus:
«Boazoorohagain geaidda lei guoskat dát ja maiddai luonddubearráigeahčus eai lean vuostecealkámušat suohkana ohcamii»
Fylkkamánni lea meannudan ohcama ja boađus lea ahte skuterláhttut giddejit sotnabeaivvi miessemánu 17. beaivvi. Fylkkamánni ákkastallá hilguma dainna ahte luonddugáhppálagat dárbbašit dál ráfis beassat lállit ja čivgat. Juste fal dan dihte go ain lea ollu muohta meahcis, dat dagaha váttis dili elliide.
Fylkkamánni reivves čuočču vel ahte dat árvvoštallan guoská sihke Finnmárkui ja Davvi-Romsii.
Ávvir ii lihkkostuvvon oažžut Guovdageainnu meahcástanlávdegotti jođiheaddji Vegard Olsen ságaide.
