Beahtahallan go eai bidjan seksualitehtaoahpahusa stádabušehttii.
NORGA: Sex og Politikk -nammasaš organisašuvdna lei vuordán stádabušeahtas seksualitehtaoahpahusa vuoruheami maŋŋel go lei lohpiduvvon Granavoldjulggaštusas, muhto leat beahtahallan go váillui stádabušeahtas.
Sii aŋkke oidnet buori viggamušaid Dearvvašvuođa-, Máhtto-, Kultur- ja mánáid- ja bearašdepartementtas, gos áigot bargat veahkaválddalašvuođa ja givssideami vuostá. Sii atnet heittohin go eai vuorut eastadeaddji ja ollislaš doaimmabijuid oahpahusas ja dearvvašvuođas.
– Seksualitehtaoahpahus addá eallinbirgejumi máhtu mánáide ja nuoraide, ovddida positiiva seksualihtehta ja lea viiddis eastadeaddji doaibma. Lea šállošahtti go ráđđehus ii dohppe vejolašvuođa ovddidit ollislaš viggamuša, dadjá beaivválaš jođiheaddji Tor-Hugne Olsen preassadieđáhusas man Sex og Politikk lea čállán.
