-Almmuhus-
OĐĐASAT Eai nagodan čielggadit oktasaš errennjuolggádusaid

Eai nagodan čielggadit oktasaš errennjuolggádusaid

-

-

Dearvvašvuođadirektoráhtta lea gohččon Fylkkamánni čohkket buot mearrádusaid ja geahččalit oažžut sadjái oktasaš suohkanlaš njuolggadusaid olles fylkii.

Romssa ja Finnmárkku fylkkamánni lea čoahkkinasttán suohkaniiguin njukčamánu 24.beaivvi ja digaštallan ášši mii guoská oktasaš njuolggadusaide errema ektui.

Máŋga suohkana Romssas ja Finnmárkkus leat mearridan báikkálaš njuolggadusaid mainna sáhttet hehttet ja maŋidit koronavirusa leavvama. Olu suohkanat gáibidit buohkaid geat bohtet máddin davás njuolgga errenáigái. Láhppi suohkan lea okta daid suohkaniin. Doppe gildet maiddái buot skohtervuodjimiid. 

Maŋemus vahkku lea Fylkkamánni bargan ovttas KS:in ja Romssa ja Finnmárkku suohkaniid ovddasteddjiiguin gávdnat vejolašvuođaid mat ovttastahttet báikkálaš errenmearrádusaid.

Vuorddašit eiseválddiid

Fylkkamánni lea koordineren ja láidestan barggu ja bargojoavkkus leat guokte čoahkkima leamašan.

– Mis lea bargojoavku mii bargá jođánit gávdnat ja geahčadit vejolašvuođaid ja evttohit oktasaš njuolggadusaid Romssa ja Finnmárkku suohkaniidda. Sii eai leat vel lihkustuvvan ovttaoaivilvuođain. Dál vuorddašit gullat maid riikka eiseválddit lohket, dadjá fylkkamánni Elisabeth Aspaker preassadieđáhusas maid Fylkkamánni lea almmuhan disdaga. 

– Mii leat maid dadjan suohkaniidda ahte sii fertejit geahčadit lagabut dan maid Ráđđehus definere leat bargi gii bargá servvodatkritihkalaš doaimmas ja muđuid váruhit ahte váldet vára dain joavkkuin.

Ulbmillaš njuolggadus

Fylkkamánni bealis dieđihuvvo ahte dán rádjái leat mii eará muttus go muđui riikka lea go buohtastahttá njoammuma. Fylkkamánni ipmirda, go smávva suohkaniin gos rašes dearvvašvuođabálvalusat leat, de háliidit suddjet sin.

– Mii leat cealkán Dearvvašvuođadirektoráhttii ahte lea buot eanemus ulbmillaš jus leat oktasaš errennjuolggadusat Davvi-Norggas, lohká Aspaker.

Geahčadit mearrádusaid

Mannan vahkku sáddii Fylkkamánni reivve suohkaniidda mas čilgejuvvo njoammunsuddjenlága mearrádus. Dearvvašvuođadirektoráhtta lea sádden bargogohččuma Fylkkamánnái čohkket suohkaniid mearrádusaid ja systematiseret daid, láidestit suohkaniid ja dárbbu mielde dárkkistit ahte mearrádusat čuvvot njoammunsuddjenlága.

Njoammunsuddjenláhka addá suohkaniidda vejolašvuođa mearrádusaid dahkat mat suddjejit álbmoga, muhto láhka gáibida daid doaimmaid leat seamma dásis go lea oaivvilduvvon lágas. 

Njuolggadusat eai ábut hehttet daid geat doaimmahit kritihkalaš beliid servvodagas ja šaddet mannat suohkanrájiid badjel.

Várrogasat lobálašvuođadárkkistemiin

Fylkkamánni čállá maid ahte sin doaibma maid lea árvvoštallat lobálašdárkkisteami suohkaniid mearrádusaid ektui mii guoská suohkanlága kapihttala 27:i ja dahkat dárbbašlaš mearrádusa jus suohkanat eai rievdat errennjuolggadusaid nu ahte leat seamma dásis go njoammunsuodjalusláhka lea.

Eiseváldi galgá dattetge leat várrogas váldit atnui lobálašvuođadárkkisteami dan sivas go suohkan lea sierra álbmotválljejuvvon hálddašandássi mas lea sierra ovddasvástádus lágalaččat. Dan sivas deattuha Fylkkamánni juohkit dieđuid ja rávvagiid suohkaniidda, ovdalii go dárkkistit mearrádusaid.

– Go mii árvvoštallat galgá go mearrádus lobálašvuođadárkkisteapmái, de galgat deattuhit riektesihkkarvuođa, dárbbu rievttálaš čielggadeapmái ja almmolašvuođa luohttámuša fuolaheami.

- Advertisement -
-Almmuhus-