Kárášjogas leat maŋemuš mánu govvejuvvon ollu ealggat márkanis, ja ikte rasttildii okta ealga čierastanluohká rabasáiggis.
Kárášjogas leat maŋemuš mánu govvejuvvon ollu ealggat márkanis, ja ikte rasttildii okta ealga čierastanluohká rabasáiggis.
Maŋŋebárggaid lea Kárášjoga čierastanluohkká rabas, muhto ikte besse čierasteaddjit vásihit juoidá erenomáža go maiddái ealga lei fuobmán man somá lea geavahit čierastanluohká. Badjelaš diibmu viđas bođii váhnen Heidi Boine iežas gánddain čierastanluohkkái, muhto šadde vuordit go ealga lei guovdu luohká.
– Go bođiimet lei ealga rasttildeamen čierastanluohká. Mii leat várra nu hárjánan oaidnit ealgga ahte ii lean hirpmástuhtti. Mánát ieža lohket ahte eai sáhte čierastit vuovddis go lea ealga lahkosis. Ealggas lei buorre dilli rasttildit luohká, iige orron gal ballamin, muitala váhnen Heidi Boine.
Vuojehii ealgga eret
Čierastanluohká bargi giddii luohká gaskaboddosaččat ja vuojehii ealgga eret, muhto Heidi Boine dattetge lohká váruhit ahte ealga sáhttá leat lahkosis.
– Mu mielas leat ealggat stuorra hástalussan Kárášjogas. Oainnán dušše mo ruovttus giksašuvvat ealggain. Eai mis oro Kárášjogas luovusbeanaváttisvuođat, muhto baicce ealgaváttisvuođat. Lean nu ollu ealggaid oaidnán ja oainnán ealggaid beaivválaččat. Eai oro ballamin olbmuin, iige elliid dieđe goassege go sáhttet vaikko goas rohkkáhit, lohká son.
Ealggat ruovttu šiljus
Su mielas leat ollu ealggat ja muitala eahkes, go gánddain bođiiga ruoktot, de ledje guokte ealgga čuožžumin bearraša šiljus Badjenjárggas.
– Šadden murdilit ja bidjat biilla nu ahte sáhtán vuoddját jus rohkkáhit, muitala son.
Ođđa váttisvuohta čuožžilan
Kárášjoga teknihkalaš ossodaga jođiheaddji Trygve Nilsen ii loga eahpádussange ahte ealga ii berre leat luohkás gos mánát ja ollesolbmot čierastit.
– Lea oalle ođđa hástalus ahte ealggat bohtet nu lahka, muhto mii leat gozuid alde go ealga ii galgga leat čierastanluohkás. Mii vuojehit eret jus fas boahtá, lohká son.
Priváhta govva
Ballu
Kárášjohkalaččat leat maŋemuš áigge govven ealggaid márkanis ja juogadan govaid viššalit sosiála mediain, maiddái Holbi fitnodaga eaiggát Marit Ragnhild Nedrejord vásihii ja vásiha ealggaid váttisvuohtan go leat nu jalut ahte eai bala olbmuin.
– Ealgga lea nu jallu, ii oba oroge ballamin olbmuin. In dieđe manin bahkke nu lahka viesuid. Mun gal dovddan ahte veaháš balan, lohká son.
Oaidná dávjá ealggaid
Nedrejord orru Márkannjárggas ja lohká dávjá oaidnit ealgga šiljus gos sihke lea ássanviessu ja fitnodat.
– Go lean jođus ihkku dahje iđđedis, de láven geahčastit oidno go ealga, muitala Nedrejord.
