Suohkanstivra ii dohkkehan evttohusa mii lei jurddašuvvon addit bálkáhuvvon virgelobi gáktegoarruide.
Suohkanstivra ii dohkkehan evttohusa mii lei jurddašuvvon addit bálkáhuvvon virgelobi gáktegoarruide.
Ivttá Guovdageainnu suohkanstivračoahkkimis evttohii áirras Ellen J. Sara Eira (SáL) ásahit duddjonvirgelobi suohkana bargiide. Evttohus hilgojuvvui go eanetlohku jienastii vuostá.
Buohkat gávttiin
Sara Eira lohká eanetlogus, geat jienastedje vuostá, leat eanas dievddut, muhto buohkat čiŋadan gávttiin čoahkkimii.
– Mii diehtit gávttiid gorrot nissonolbmot, ja leat ollugat geat gorrot čiŋaid olles bearrašii, erenoamážit ovdalaš meassuid, nu movt konfirmašuvnnaide ovdal beassážiid. Danne livččii dat virgelohpeevttohas eanas nissonolbmuid várás, lohká son.
Eai dárbbat idjii goarrut
Son lohká dat maid sáhtášii eastadit buozalmasvuođajávkama, ja muittuha maid suohkandoavttir Runar Bjelland rávvii mannan dálvvi.
– Suohkandoavttir vásihii dalle ahte erenomážit ovdalaš beassážiid lei stuorra lassáneami gargŋil- ja oalgečalbmebákčasiin mat bohte duddjomis. Danne heivešii dákkár virgelohpi ollugiidda, geat leat olles barggus beivviid, ja de galget maŋŋel barggu čohkkedit goarrut maŋŋi eahkedii ja muhtumiin idjii, lohká Sara Eira.
Eastadivččii
Duojár ja suohkanbargi Sara Karen Anne Gaup Sara lohká dákkár duddjonvirgelohpi livččii hui buorre.
– Dat lei hui buorre evttohus ja livččen áinnas váldán, vaikko vel bálkká haga maid. Mun lean juo ovdal maid váldán vásedin virgelobi barggus vai ollen duddjot ovdalaš meassuid. Nu movt lean gullan, de gávdnojit olbmot geat buohccindieđihit iežaset vai ollejit goarrut. Dákkár virgelohpi eastadivččii dan ja maid loktešii árvvu goarrumis, ja dagahivččii dan maid eambbo dohkálažžan, lohká Gaup Sara.
Čájehit movt gokčá
Suohkana várresátnejođiheaddji Anders S. Buljo (JL), gullá eanetlohkui mii jienastii vuostá evttohusa.
– Jurdda livččii hirbmat buorre, muhto čilgehus manne jienasteimmet vuostá lea hui álki. Mis leat birrasii 300 bargi, ja vihtta beaivvi virgelobi gokčat daidda lea stuora gollun. Evttohus mii máksá, dasa ferte čájehuvvot movt gokčat goluid, ja dat ii lean dán evttohusas, čilge Buljo.
Guorahallat
Buljo iige loga doallat deaivása ahte jienastuvvui vuostá go leat eanas dievddut eanetlogus.
– Dat ii leat duohta, go das lei sáhka evttohusa bidjat bušehttii, ja ferte dárkilit guorahallat lea go praktihkalaččat vejolaš obage čađahit dákkár duddjonvirgelobi. Sáhttá leahkit nu ahte de áigot buohkat váldit duddjonvirgelobi, vel sii nai geat eai dábálaččat duddjo, lohká son.
Evttoha fas
Sara Eiras lea ipmárdus ahte suohkana ruhtadili geažil jienastuvvui evttohusa vuostá, ja lohká dasa ferte áigi láddat.
– Suohkanstivra ii miehtan guorahallatge lea go vejolaš čađahit dan jurdaga, muhto mun gal áiggun evttohit dan duddjonvirgelobi maŋŋil fas danne go oainnán dan hui dehálažžan, lohká son.
