-Almmuhus-
KULTUVRAEai mieđit luoitán plagiáhta SGP:ii

Eai mieđit luoitán plagiáhta SGP:ii

-

-

Sámi Grand Prix álgojurie ii mieđit vuoitoluođi leat seamma luohtin go Arne Hansena luohti. Liikká sádde festivála daid vel nuohttačeahppái.

Sámi Grand Prix álgojurie, mii lea dohkkehan buot luđiid ovdal gilvvu, lea dál ođđasit guldalan ja buohtastahtten Skomáhkár Ánde luođi, mainna Johan Anders Bær vuittii SGP beassášlávvordaga, ja Arne Hansena luođi. SGP álgojurie lea ge gávnnahan ahte ii leat seamma luohti.

 – Álgojurie dadjá ahte muhtin osiin luođis juoigá Bær seammaládje, eará osiin ges ii. Danne Johan Anders Bær ii juoigga Arne Hansena luođi. Mii leat Sámi musihkkafestiválas goitge sádden jearaldaga ovtta nuohttačeahppái vai árvvoštalašii vel dáid luđiid, dadjá Sámi musihkkafestivála buvttadeaddji Nils Johan Vars.

Dan nuohttačeahpi nama son ii muital vuos, muhto lohká sávvat oažžut sus vástádusa ovdal vahkkoloahpa.

 

Imaštallaba movt luitet sisa

SGP 2015 álgojurie:

Marit Kristine Hætta Sara

Aslak Anders Gaino

Åsá Márgget Anti

Karen Anne Anti Kildedam ja Anne Kirsten Holmestrand Hansen dat leaba váidán ahte Bær juoiggai sudno vilbeali Arne Hansena luođi. Soai imaštallaba movt álgojury lea oba luoitán ge dán luođi gilvui. Arne Hansena luohti lea almmuhuvvon skearrus 2013:s.

 – Letne čállosa bokte sádden reivve musihkkafestivála hoavddaide ahte diet vuoitoluohti gávdno skearrus jo. Jus jury ii gávnna dahje dárkkis lea go luohti ovdal ráhkaduvvon, de orru heittot, dadjá Holmestrand Hanssen Ávvirii.

 

Holmestrand Hanssen oaivvilda ahte SGP vuoitoluođis ja Arne Hansena luođis ii leat go táktaerohus. Son maid ávžžuha dál musihkkafestivála duođalaččat váldit luođi.
 – Jus dát lea vuohki ahte álo šaddá váidda, de han nohká Sámi Grand Prix. Eai searvva juoigit, go sii šaddet dego bilkun. Juries fertejit luohtečeahpit geat iešguđet guovlluin bohtet, mat dovdet ja máhttet luđiid, dadjá Hansen.


II MIEĐIT PLAGIÁHTTAN: SGP 2015 juoiganoasi vuoiti Johan Anders Bær.

Ii mieđit
Beakkán juoigi ja SGP vuoiti Johan Anders Bær ii mieđit iežas váldán ovttage eará olbmo luođi SGP: ii. Son muitala buriin jáhkuin sádden luođi gilvui gos jurie lea dohkkehan dan. Ieš ii loga háliidit kommentere ášši bearehaga, muhto lasiha:

 

 – Leat vaikko man olu luođit mat sulastahttet ja plagieren lea de garra sivahallan, man várra sáhtášii jorgalit buhtadusáššin, dadjá son.

Dávjá dákkár čuoččuhusat
Plagiáhttačuoččuhusat bohtet ge measta juohke jagi SGP maŋŋel. Buvttadeaddji Vars ii loga iežas suorganan.
 – Mun in lean gal ráhkkanan dasa, muhto dan dáfus go juohke jagi boahtá dakkár čuoččuhus, de in hirpmástuvvan. Ferten divvut vel ahte soai geat leaba váidán, eaba leat geavahan plagiáhtta-doahpaga, muhto čuoččuheaba lea seamma luohtin, dadjá Vars.

 

 

-Almmuhus-