Fylkkamánni addá vuodjinlobi NRK «Giđđajohtin minuhtas minuhttii» prográmmii, vaikke leage geassán buot sierralobiid muđuid Fálesnuori suohkanis.
Ikte gesii Fylkkamánni ruovttoluotta skohtervuodjinsierralobiid mat ledje addon Fálesnuoris.
Dat mearkkašii ahte maiddái NRK «Giđđajohtin minuhtas minuhttii» prográmma massii sierralobiid.
Sii dattetge sáddejedje ohcamuša Fylkkamánnii, beassat liikká vuodjit ja dál lea čielgan ahte fylkkamánnii dohkkeha ohcamuša odne, gaskavahko, čállá NRK Sápmi.
– Mii addit sierralobi NRK:i eavttuid mielde mat vuhtii váldit guovllu boazodoalu, lohká Fylkkamánni birasgáhttenhoavda Bente Christiansen preassadieđáhusas.
Direktevra duđavaš
– Fylkkamánni lea máilmmi bures gieđahallan ášši, bures ja beaktilit, lohká NRK Sámi direktevra Mona Solbakk.
Son ii loga iežas moktege ballan ahte prográmma buvttadeapmi bissehuvvo.
