-Almmuhus-
OĐĐASATEai loga leat álkin álggahit ođđa ruvkkiid Ruoŧas

Eai loga leat álkin álggahit ođđa ruvkkiid Ruoŧas

-

-

Rogganlobi oažžut ođđa ruvkkiide Ruoŧas lea hui moalkái ja áddjái, oaivvilda Boliden ruvkefitnodat, mii lea baicca sirdán doaimmas Supmii. Ruoŧa Sámediggi oaivvilda ahte ruvkkiin čuvvot olu váikkuhusat ja jus ii guorahala birasváikkuhusaid, de ii leat váldime ovddasvástádusa.

– Proseassa ferte ádjánit, lohká Sámedikki boazodoallolávdegotti jođiheaddji Marita Stinnerbom.

 Son lohká ahte lea issoras dehálaš ahte proseassa lea áibbas čielggas go fitnodagat áigot álggahit ruvkkiid, earenoamážit boazodoalloguovlluin. Dan čállá Ruoŧa Sámediggi preassadieđáhusas.

 

Geahččalit rievdadit

Svemin suorgeorganisašuvdna bargá garrasit rievdadit lágaid vai šaddá álkibun álggahit ruvkkiid. Earret eará oaivvildit ahte Bergstaten, leanastivra ja eana- ja birasduopmostuollu dulkojit birasnjuolggadusaid bearehaga.

Ákkástallojuvvo ahte ferte lasihit ruvkkedoaimmaid dan dihte go lea dárbu eará metállaide go galget ráhkadit birasseasti teknihkaid, nu go beaiveseallaid ja ođđamállet báhtteriid.

 

– Ii galgga leat álki

Dat maid suorggi ovddasteaddjit eai muital, lea ahte Ruoŧŧa lea jo njunuš ruvke- ja minerálanašuvdna. Eanaš ruvkeásaheamit  ja prospekteremat gullet maid Sápmái, gos boazodoallu lea riikaberoštupmin, čuoččuhuvvo preassadieđáhusas.

– Ii galgga leat álki álggahit ođđa ruvkkiid. Leat stuora biras-, luonddu- ja kulturárvu mii sáhttá vaháguvvat. Dat deháleamos jearaldat boahtteáigái ii leat man jođánit mii sáhttit billistit min luonddu ja birrasa go ohcat metállaid – go eat dieđe movt galgat gáhttet min luonddu ja birrasa boahtteáiggi buolvvaide, lohká Marita Stinnerbom preassadieđáhusas.

Boazodoallu lea riikaberoštupmin leamaš dan rájes go lágalaččat dohkkehuvvui sierra doaban 1987:s.

 

-Almmuhus-