Eai liikká olu duššan muohtauđđasiin

Dán jagi eai leat liikká ollugat duššan muohtauđaslihkohisvuođain go ovddit jagiid. Dán dálvvi jápme guovttis muohtauđđasis. Ivgus, Romssas, jámii okta olgoriikka turista, ja Møre ja Romsdalas jámii okta olmmoš go skálvi fierralii. Jápminlohku ii leat leamaš ná vuollin 2005 ja 2006 rájes, dan dálvvi jápme maid guovttis.

Muohtauđasvárrehusa jođiheaddji Rune Engeset lea duhtavaš go lohku njiedjá, muhto lohká ahte lea ain oalle mátki mihtu rádjái.

– Vai galgat olahit iežamet mihtu, mii lea ahte ii okta ge galgga duššat, de fertejit olu oasit deaivat seamma áigodaga. Buohkat fertejit váldit vuhtii uđasvára ja várrehusa. Dilálašvuođat mat leat váris, fertejit leahkit diehttevaččat, lohká Engeset.

Eambbosat geavahit uđasvárrehusa

Uđasvárrehussiiddus Varsom.no dieđihuvvo makkár uđasvárra lea juohke guovllus, ja siiddu geavaheaddjit leat lassánan mannan áigodaga.

Geavaheddjiid iskkadeapmi man muohtauđasvárrehus lea čađahan, čájeha ahte 60 proseantta oaivvildit ahte sii leat, dahje soames gean sii dovdet leat garván uđaslihkohisvuođa várrehusa dihtii. Liikká oallugat lohket ahte leat oahppan juoidá go leat geavahan várrehusa.

Dán jagi leat siidočájeheamit lassánan 50 proseanttain diimmážis.

Turisttaide jorgalit siiddu

Vaikko olusat geavahit várrehussiiddu, de áigot jorgalit siiddu eará gielaide, vai turisttat maid sáhttet geavahit siiddu. Engeset jurddaša erenoamážit čuoigan- ja skohterturisttaid.

– Várrehus galgá boahtit itália-, fránska-, duiska- ja suomagillii. Mii leat maid geahččaleame oažžut uđasvárrehusa oassin skohteroahpahussii, lohká Engeset.

Muohtauđasvárrehus Norggas lea dálvvis registreren 79 uđđasa dahje measta-lihkohisvuođaid. Oktiibuot leat 168 olbmo leamaš dain uđđasiin. Dat lea lassáneapmi diimmážis. Eanemus dáhpáhusat leat registrerejuvvon Romssas ja Nordlánddas.