Lea nu stuora beroštupmi golgodávdda vuostá oažžut boahkuid dán jagi, ja leat ferten lassivuorkkás diŋgot eanet.
Norrbotten regiovnnas árvvoštallet badjelaš 80 proseantta váldit boahkuid buohkain geat leat badjel 65 jagi boarrásat, eará riskajoavkkus dahje geat barget dearvvašvuođaossodagas dahje fuolahusas.
– Lea hirbmat buorre go nu ollugat leat jo váldán boahkuheami dán rádjái, lohká njoammuneastadandoavttir Anders Nystedt.
Diŋgon vel eanet
53 000 boahkkodosa ledje diŋgojuvvon, ja dat lea olu eanet go mii lea dábálaš. Dál leat ferten diŋgot vel moadde duháha eanet boahkuid, našunála lassivuorkkás.
– Sii geat leat riskajoavkkus eaige leat ollen boahkuhuvvot, fertejit váldit oktavuođa. Mii joatkit boahkuhemiin nu guhká go leat vaksiidnadosat ja leat diŋgon lassi boahkuid go beroštupmi lea nu stuoris, lohká Girona, Jiellevári ja Bihtáma lagasbuohcciviesu jođiheaddji Anna Alm Andersson.
Ovddit jagi válddii sullii bealli buot Norrbottena álbmogis geat gullet riskajovkui ja leat badjel 65 jagi boarrásat.
Norrbotten dearvvašvuođaossodat dieđiha leat olahussan dán jagi boahkuheapmi go leat nu máŋggas geat válljejit váldit dán boahku.
