Eilif Aslaksen lea iežas cealkán eret Finnmarken aviissa doaimmaheaddjevirggis.
Dán dieđiha iFinnmark gaskavahkku. Aslaksen álggii Finnmarken váldodoaimmaheaddjin golggotmánu 1. beaivvi 2015.
Gaskavahkku dieđihii son doaimmahusaide iežas mearrádusa.
–Oahppan olu
Son deattuha ahte áigodat Finnmarkenis lea gelddolaš leamaš ja son lea oahppan ollu, ja dadjá ahte lea leamaš hávski bargat ovttas aviissa bargiiguin, čállá iFinnmark.
– Lea gáibideaddji ráhkadit buori sisdoalu mii gáibida ollu áiggi ja resurssaid. Dat dáhpáhuvvá oktanaga go rievdadusat gevvet jođánit sihke mis ja muđuid suorggis. Jus galgá leat mielde dás, de gáibiduvvo čuovvolit bisánkeahttá. Lean ollen dasa ahte in šat oainne ávkkálažžan munnje dahje Finnmarkenii joatkit barggus, lohká Eilif Aslaksen iFinnmarkii.
– Mus eai leat makkár ge plánat guđe ge guvlui go heaittán barggus, muitala Aslaksen gii lea moadde mánu smiehttan ahte áigu luohpat.
Stivrajođiheaddji Marit Skog muitala ahte lagamus áiggis ohcagohtet ođđa váldodoaimmaheaddji.
