-Almmuhus-
OĐĐASATEai leat dahkan dan 38 jahkái

Eai leat dahkan dan 38 jahkái

-

-

Ivnniiguin joavku geat álge čuojahit fárrolaga jagi 1978:s ja almmuhedje dalle skearru, leat dál bargagoahtán almmuhit iežaset nuppi skearru.

Ivnniiguin joavku lea dán vahkus čoahkkanan ja plánegoahtán ođđa skearru. Joavkku álggaheaddji ja čuojaheaddji Sverre Hjelleseth muitala DAT lágádusa bokte sii leat almmuheamen skearru, ja plána mielde galgá ođđa skearru almmuhuvvot boahtte jagi, 2017:s.

 

Olbmot jearahan

Dasa leage gollan 38 jagi go  vuosttaš skearru almmuhedje LP ja kaseahttahámis, ja joavku njurggonasčuojaheaddji ja lávlu Iŋgor Ante Ailo Gaup muitala ollus leat jearahan iigo gávdnošii Ivnniiguin musihkka oastimis CD-skearrus.

– Min musihkka ii gávdno eará dan vuosttaš skearrus, ja vel NRK Sámerádios báddemat, ja  danne leage áigi almmuhit dál ođđa skearru, lohká son.

 

Radios čuojahuvvo

Ivnniiguin joavku čuojahedje vuosttaš geardde almmolaččat «plasthallas» Guovdageainnus, beassážiid njukčamánu 24. beaivvi jagi 1978:s. Sii ledje dan geasi mielde «Kararockenis», gos NRK Sámerádio báddii golbma lávlaga sis.

– Sámerádios čuojahedje «Ale gul čiero» ovttohii guldaleddjiid sávaldagaid mielde dan geasi, ja nu bovdiige Sámerádio min studioi čuojahit eanet, ja mii báddiimet de nuppelohkái lávlaga, muitala Hjelleseth.

(Ášši joatká gova vuolábealde)

 


Ivnniiguin vuosttaš skearru mii almmuhuvvui jagi 1979.Boahtte jagi 2017, 38 jagi maŋŋil  ilbmá sis ođđa skearru.

–Álggiimet rievttes áiggis

Joavku álggahuvvui go Gaup háliidii sámegillii lávlut, go ii dovdan nu bures olgoriikkalaš musihka. Gaup čáliige eanaš Ivnniiguin lávlagiid, ja jáhkká sii váldojuvvojedje bures vuostá go dan áigge eai gávdnon nu ollu musihkka sámegillii, ja seammás lei čuvgehusáigi sámiid gaskas.

 – Mii deaivvaimet álgit juste go ledje Álttá-ákšuvnnat, ja jáhkán mii devddiimet guoros saji maid olbmot ledje váillahan.

 

Doalahit iežaset šuoŋa

Nu ožžoge Ivnniiguin 1979:s skearrukontrávtta, ja báddejedje dan Oslos. Hjelleseth muitala sii ledje maid mielde TV-prográmmaiguin, vaikko eai lean teknihkalaččat nu čeahpit.

– Teknihkalaš dássi min musihkas ii lean nu beare buorre, muhto dat ii orron dahkame maidege olbmuid mielas. Vaikko dieđusge leat šaddan čeahpibut čuojahit áiggi mielde, de áigut geahččalit doalahit dan Ivnniiguin šuoŋa ođđa skearrus, lohká son.

(Ášši joatká video vuolábealde)

 

Ivnniiguin joavku guldalit iežaset vuosttaš báddema maid leat dahkan fargga 40 jagi áigi.

Eai gullon gostege

Gaup ja Hjelleseth muitaleaba sis gávdnojit birrasiid 40 lávlaga, ja sis leat maid ođđa lávlagat mat eai leat goassige gostege gullon.

– Olbmot háliidit daid boares lávlagiid, ja dan galget oažžut, muhto mii dáidit vel ráhkadit moadde ođđa lávlaga mat váldojuvvot fárrui ođđa skerrui, lohká Gaup.

 

Ain dollet konsearttaid

Vaikko leat áigásaš joavku, de sii ain dollet konsearttaid. Ihttin lávvordateahkeda galget ge sii doallat konseartta Guovdageainnus. Hjelleseth muitala sis lei 17 jagi boddu go fas álge 1997:s. Dan maŋŋel manai moadde jagi ovdal fas dolle konsearta.

– Maŋemus 15 jagi leat mii čuojahan juohke jagi konsearttaid, ja lea hui somá oaidnit go ain lea olbmuin beroštupmi min musihkkii, lohká Sverre Hjelleseth.

 

 

 

 

 

 

 

 

 

 

-Almmuhus-