– Eai leat báljo sánit

Odne čađahuvvo skuvlaválggat Sámi joatkkaskuvllas ja boazodoalloskuvllas Guovdageainnus. Gávcci bellodaga ledje searvan suohkana bellodagain skuvlaválgii. Skuvllas leat 90 oahppi ja 77s  jienastedje. 30 oahppi jienastedje Bargiidbellodaga ja sii šadde ge čielga válgavuoitin go 39 proseanta jienasteddjiin jienastedje sin. Dálá sátnejođiheaddji listu ii ožžon eará golbma jiena.

Eai leat sánit

Guovdageainnu Bargiidbellodaga sátnejođiheaddjievttohas, Johan Vasara lea hui movttet. Son lea nu movttet ahte measta juo njuorrasa. 

 – Gal dat les somá, mus eai leat báljo sánit čilget dán dovddu. Jurddašan maid ahte dát nuorat sáhttet maid  jienastit  dan albma válggas vahkku geahčen,  ja dat buktá munnje buori dovddu, lohká Vasara.

Vasara jáhkká ahte skuvlaválggaid bohtosat addet juogalágán gova das makkár doarjju sis lea Guovdageainnus, go oaiviliskkadeamit maid čájehit ahte BB ovdána.  

– Dát govva orru hui positiiva min dáfus, lohká son.

Nuorat jienastit nuoraid

Sámeálbmot listtu sátnejođiheaddjievttohas ja Guovdageainnu suohkana dálá sátnejođiheaddji, Klemet Erland Hætta, lohká iežas juo vuordán dákkár bohtosa. Liikká ii leat gal movttet go dušše golbma oahppi jienastedje Sámeálbmot listtu. 

 – Na dat eai lean gal beare olu jienat, dadjá son

Hætta jáhkká dan go sin nuorra listtoevttohasas ii lean vejolašvuohta searvat válgadigaštallamii sáhttá čilget heajos bohtosa. 

– Nuorat jienastit nuoraid, ja go mis ii lean min nuorra listtoevttohus dáppe, de sáhttá dat váikkuhan veaháš bohtosii. Ja diehtelasat mii eat leat goassege nu buriid bohtosiid olihan skuvlaválggain, lohká Klemet Erland Hætta.

Bures čađahuvvon

Joatkkaskuvlla oahppi gii maid lea leamašan mielde lágideamin válggaid, Ulrika Snowdon, muitala ahte válggaid čađaheapmi manai bures. Son maid muitala ahte guokte bellodaga eai lean mielde válgadigaštallamis mii skuvllas lágiduvvui ovdal go oahppit jienastedje. Dat guokte bellodaga/listu ledje bellodat Risttalaččat ( ja Guovdageainnu Dáloniid listu.

Sáhttet manahan jienasteddjiid

Guovdageainnu Dáloniid listtu sátnejođiheaddjievttohas, Hans Isak Olsen, šálloša go eai sáhttán searvat skuvlaválggaid válgadigaštallamii.  

– Dađibahábut eat sáhttán searvat. Dat lea dan geažil go ieš in astan barggu geažil ja earát ledje sarvvabivddus, lohká Olsen.

Balat go manahit nuorra jienasteddjiid jienaid albma válggain go ehpet searvan skuvlaválgadigaštallamii?

– Dat sáhttá nu ahte mii manahit dan geažil nuorra jienasteddjiid jienaid,   muhto go eat sáhttán searvat, de dasa eat veaje šat maidege dahkat dál, lohká Olsen.