Álbmotdearvvašvuođainstituhtta ii jáhkkimis rávve njealját koronaboahku sidjiide geat leat vuollel 45 jagi boarrásat.
Guhkit áiggi vuollái eai jáhke earáide go vuorasolbmuide fállat koronaboahkuid juohke jagi.
– Nu go dál lea dilli, de eat áiggo rávvet ođđa koronaboahkuid dearvvaš olbmuide geat leat nuorabut go 45 jagi, muhto dan árvvoštallat dađistaga daid dieđuid vuođul mat mis leat epidemiija ja boahkuid birra, dadjá Álbmotdearvvašvuođainstituhta (FHI) bajitdoavttir Preben Aavitsland TV 2:i.
Mannan gaskavahku dadjá Álbmotdearvvašvuođainstuhta ossodatdirektevra Are Stuwitz Berg NTB ođasdoaimmahahkii ahte maŋŋel geasi sii buktet ođđa rávvagiid čavčča boahkuhemiid birra. Suohkaniidda lea FHI dieđihan dán mánus ahte jáhkket suohkaniid šaddat čakčat fállat ođđa boahkuid olbmuide geat leat badjel 65-jahkásaččat dahje leat eará riskajoavkkuin.
– Eanemus jáhkehahtti fállojuvvojit vuorrasiidda boahkut oktii jagis, muhto nuorra olbmot birgejit daid haga. Dat vuolgá dieđusge das man guhká boahkut doibmet dávdda vuostá ja makkár virusvariánttat njommot lagamus jagiid, dadjá Aavitsland.
(©NTB)
