Finnmárkku buohcceviesu stivra mearridii ovttajienalaččat ahte dorjot prošeaktajoavkku guorahallama ahte ii galgga ovttastahttit Davvi-Norgga universiteahttabuohcceviesu ja Finnmárkku buohcceviesu.
Finnmárkku buohcceviesu stivra čilge, preassadieđáhusas, ahte ulbmil evttohuvvon ovttastahttimis lea nannet sihke Finnmárkku dearvvašvuođafálaldaga ja Davvi-Norgga universiteahttabuohcceviesu. Dát mielddisbuvttášii ahte buohcceviessu galggašii gokčat 35 proseantta Norgga eatnamiin ja ovttasbargat 49 gielddas. Finnmárkku buohcciviesu mielas leat duođalaš váikkuhusat jus ovttastahtášii dán guokte buohcceviesu. Stivrra mielas lea buoret ovttasbargat bures ja dat nannešii fálaldaga buhcciide.
