Unjárggas ii leat šat karantenamearrádus otná rájes.
Unjárgga gielda dieđiha preassadieđáhusas ahte lea ovttasráđiid gielddaváldodoaktáriin mearridan ahte eai daga ođđa karantenamearrádusaid gielddas. Dat mearkkaša ahte mearrádus dahkkon cuoŋománu 16. beaivvi njoammuneastadanlága vuođul ii ođasmahttojuvvo ođđasit cuoŋománu 23. beaivvi.
Bearjadaga 24. beaivvi rájes čuovvu Unjárgga gielda nationála rávvagiid ja mearrádusaid. Cuoŋománu 23. beaivvi rádjái eai leat registrerejuvvon ođđa positiivvalaš iskosat, ja sii eahpidit eambbosiid ožžon njoammudávdda.
– Gielda ávžžuha ain čuovvut njoammudávdda eastadanrávvagiid nu go váruhit gaskka eará olbmuide, bassat bures ja dávjá gieđaid, ja bissut ruovttus jus dovdá iežas buohccin. Nationála doaibmabijuid gávdná ráđđehusa ruovttusiiddus, dadjá sátnejođiheaddji Knut Store preassadieđáhusas.
