-Almmuhus-
-Almmuhus-
-Almmuhus-
KULTUVRAEai goassege leamaš nu guhkkin

Eai goassege leamaš nu guhkkin

-

-

Sámi Jienat lea olleme Snoasai. Dál áiggošedje oahppat maid lullisámi juoiganmálle.

Bearjadaga olle Sámi Jienat koarra Snoasai Lulli-Sápmái, oahpahallat Lulli-sámi luđiid. Koaras leat 22 olbmo ja sin dirigeanta Bernt Mikkel Haglund. Jonhild Jåma galgá leat sin oahpaheaddji doppe, ja lávvordateahkeda lea juo sis konsearta Snoasa hoteallas. Koarra mas leat sámi miellahtut sihke Norggas, Suomas ja Ruoŧas, lea juo dán juoiganprošeavttas leamaš olu báikkiin.

 

Čoaggime konsertii luđiid

Dán prošeavtta namma lea Luođit miehtá Sámi, ja boađus galgá leat konsearta mas juiget buot guovlluid luđiid Sámis. Sámi Jienat stivrrajođiheaddji Heidi Salmi muitala sii leat leamaš juo viidát johtime.

 – Mii leat dál ráhkadeame konseartaprográmma masa galget luođit miehtá Sámi. Leat fitnan sihke Čeavetjávrris oahpahallame levdet nuortalaččaid vuogi mielde, Jáhkovuonas čohkkeme mearrasámi luđiid, julevsámi luđiid Johkamohkis ja davvisámi luđiid Gáresavvonis. Go geargat Snoasas, de ráhkadit konseartaprográmma maid hárjehallat juoigat.

 

Luohti dušše

Skápma mielde galgá de leat konseartaprográmma gárvvis. Salmi lohká juohke báikkis de galgat doallat nuvttá konsearta. Sis eai leat musihkkárat mielde dán háve.

 – Luođit leat nugo luođit leat, muhto leat dieđusge heivehuvvon korii, dadjá Salmi.

 

Guhkimus dán rádjái

Sámi jienat koarra ii leat ovdal leamaš guhkkelis go Upmis, Ráhkas Lulli-Romssas ja Anáris. Sii lávejit hárjehallat dušše vahkkoloahpaid njeallje geardde jagis.

 – Go mii johtit, de háliidit rekrutteret olbmuid dain báikkiin. Dál eat dieđe boahtá go oktage máttasámis min fárrui, muhto lávet oažžut ođđa miellahtuid go boahtit ođđa sámi guvlui lávlut ja juoigat, dadjá Salmi.

 

 

-Almmuhus-