– Eai gávdno sánit govahallat dán

Juoigankonsearta ovttas stuorra symfoniijain, ja de seaguhat dasa vel veahá baleahta ja «sydis» dánsuma, de oaččot ávvukonseartta man leat gohčodan «Eallima illu».

Ávvir háleštii muhtin gehččiiguin maŋŋel čájálmasa, ja buohkat rábmojedje dan.

– Stuorra vásáhus

Siri Persson lea Jienjeváris eret, dál ássá Gironis.

Son liikui hirbmosit čájálmassii.

– Lei hirbmat stuora vásáhus leahkit sálas, beassat oaidnit ja gullat sámi njunuš artisttaid. Bihtá fáddá lei sullii seamma maid Elsa Laula su áiggis humai, ja dat bissu áin.

– Dehálaš ášši

Aslat Holmberg Njuorggánis eret maid liikui.

– Somá čeahpes máilmme musihkkariid guldalit. Lei dehálaš ášši maid ovdanbukte. Hui somá lei oaidnit ja gullat dákkár hámis maid dákkár áššiid ovdanbuktojuvvot.

Čuozai

Liv Slettli Lulli-Romssas lohká čájálmas deaivvai su njuolga váibmoruohttasii.

– In lean vuordán ahte galggai ná munnje váikkuhit. Ledjen vuordán ahte soaitá hui ođđaáigásaš, muhto beasaimet oaidnit dološ historjjá, ja mun dovden dego ahte lea gosa mun gulán. Hui buorre dialoga, dánsa ja oktavuohta sis geat ledje lávddi alde. Mun dovden ahte juohkehaš oažžu juoga dán čájálmasas. Ferte váldit vára iežas historjjás, ja gos boahtá.

– Eai gávdno sánit

Maiddái suomabeale sámediggepresideanta liikui čájálmassii.

– Mus eai leat sánit govahallat dan čájálmasa, mun in lean ollenge vuordán dákkára, dat lei áibbas erenoamáš fiinnis ja erenoamáš ilus mun lean dán nuorra nisson dáiddáris, Marja Mortenssonas, gean leat dáppe beassan oaidnit máŋggain dilálašvuođain odne, logai Suoma sámediggepresideanta Tiina Sanila-Aikio dakka maŋŋil čájálmasa.

– Mus eai duođaid gávdno sánit govahallat daid dovdduid mat ledje dan čájálmasa botta, dat lei nu máŋggabealat lei maiddái dánsun, mun iežan kultuvrras oidnen maid dánsuma dáppe lávdde alde, ođđa hámis. Dat guoskkahii erenoamážit, lohká son.

– Dus orrot measta gatnjalat vel?

– Jua, muđuige dát beaivi lea leamaš erenoamáš ja dat oktavuohta mii lea olbmuid gaskkas dáppe Troanddimis odne, de dat lea juoga man ii vásit juohke beaivve. Ja odne lean máŋgii jurddašan ahte vare dán sáhtašii váldit fárrui ruoktot ja muitit juohke beaivvi go barggat bohccuiguin, dahje dan botta go jorgalat sámegielat teavstta dahje go leat oahpaheamen min mánáid ja nuoraid, de dat livččii juoga masa mis livččii dárbu, dáid áiggiid. Dáid garra áiggiid.

– Jáhkán geasuhit olggobeale davviriikkaid

Nubbi guhte maid lei liikon čájálmassii lei stuorradiggepresideanta Olemic Thomessen.

– Mu mielas lei áibbas erenoamáš čájálmas, mii čájeha man dehálaš lea ahte mis leat sámi dáiddárat buot agiin, ahte čájehat sámi kultuvrra ealli kultuvran mas leat garra dálá áigge ovdanbuktimat. Dán čájálmasa jáhkán heivet buohkaide, leaš dal sápmelaš vai ii ja lean áibbas sihkar dasa ahte dát geasuha maiddái gehččiid olggobeale davviriikkaid, logai son.

– Dasa lassin lei somá oaidnit Mari Boine, lean dan mađe agis ahte lean su čuvvon jahkeviissaid, son lea erenoamáš buorre artista, logai Thomassen.

Juoigan, lávlun, dánsun ja neaktin

Olavshallen Troanddimis lei measta áibbas dievva.

Čájálmasa leat dramatihkkar Rawdna Carita Eira, šuokŋadahkki Frode Fjellheim, lávdehábmejeaddji Aage Gaup, lihkadanhábmejeaddji Elle Sofe Henriksen, filbmagovvejeaddji Andreas Ausland ja Beaivváš Sámi Našunálateáhter ovttasráđiid ráhkadan.

Geahččit besse vásihit Mari Boine, Sofia Jannoka, Wimme Saari, Marja Mortenssona, Iŋgor Ántte Áilu Gaupa, Bjørn Sundquista, Egil Keskitalo ja Mary Sarre, geat ovdanbukte luđiid, lávlagiid ja nekte.

Dasa lassin ledje dánsejeaddjit Sudesh Adhana, Nora Svenning, Jens Trinidad, Hanne E. Svenning ja Minna Melqvist.