-Almmuhus-
OĐĐASATEai gáibit šat heaitit boazodoalus jus dubmehallaba

Eai gáibit šat heaitit boazodoalus jus dubmehallaba

Journalista

-

-

Áššáskuhttoneiseváldi ii šat gáibit áššáskuhtton dievddut galgaba eret boazodoalus ja eaba beasa šat bohccuiguin bargat, jus dubmehallaba lágamánnerievttis.

Otne joatká guoddalandiggi Romssas Hålogalándda lágamánnirievttis Finnmárkku boazodoalli guoktá vuostá, geat Sis-Finnmárkku diggegottis áššehuvaiga verrošan- ja biinnidanáššis.

 

Ii šat vuođđu

Økokrima vuosttašadvokáhtta Hans Tore Høviskeland muitala áššáskuhttimis leat poastat váldon eret nu movt doaibmagielddus, ja áššáskuhttineiseválddis leat maiddái ođđa vihtanat áššis.

– Doaibmagielddus ii leat váldon mielde, danne go leat máŋga eavttu mat galget gokčojuvvot čuoččuhit doaibmagildosa. Mii oaidnit ahte lea guhkes áigi mannan das rájes go rihkolaš dagut leat dahkkon, ja ii leat šat vuođđu gáibidit doaibmagildosa.

 

Ii váikkut áššái

Høviskeland ii loga das váikkuhusa njuolga áššái, go dat doaibmagielddus ii leat ráŋggáštus.

– Doaibmagielddus ii leat ráŋggáštus, muhto galgá suodjalit elliid, ja danne ii muđui váikkut ráŋggáštusmihtideapmái, lohká son.

 

Vuordá seamma bohtosa

Trond Biti, gii lea nuorat dievddu nubbi bealušteaddji, ii loga oaidnit ahte leat boahtán nu ollu ođđa bealit ja erohusat áššis diggegotti ektui.

– Diggegottis čuoččuhedje áššáskuhttit doaibmagildosin, mii mearkkaša ahte soai galgaba dubmehallat nu ahte eaba beasa šat bohccuiguin bargat viđa jahkái, dan leat dál mearridan váldit eret.  Leat maid dušše moadde ođđa vihtana Stáhta Luonddubearráigeahčus ja muđui gal leat seamma vihtanat. Danne vurde Ketil Nilseniin (nubbi bealušteaddji) áššis seamma bohtosa lágamannerievttis go diggegottis, muhto dieđusge lea dat lágamannemannerievtti duohken, mii mearrida áššis, lohká Biti.

 

Máhtolašvuohta hástalussan

Dat maid Biti oaidná hástalussan ja erohussan lágamannerievttis diggegotti ektui, lea máhtolašvuohta boazodollui.

– Diggegottis lea sundi gii bures dovdá boazodoalu, ja ledje maiddái mielduopmáriin, gos nubbi lea bajásšaddan boazodoalus, ollu máhtolašvuohta boazodoalu birra.

Biti lohká Norggas lea diggevuogádat nu, ja leat unnán sápmelaččat doppe geain livčče máhttu boazodoalu birra.

– Lea maid nu ahte ii sáhte válljet iige leat gáibádus ahte mielduopmáriin galgá leahkit fágalaš duogáš áššái, lohká son.

 

Dievaslaš gelbbolašvuohta

Dasa ahte go bealušteaddji Trond Biti oaivvilda lágamánnerievttis ii soaitte nu ollu máhttu boazodoalu birra, ii áiggo Høviskeland dadjat das nu ollu.

– Dat oažžu leahkit su oaivil, muhto das lea ášši duođaštusárvvoštallan, ja dasa gal oaivvildan ahte lágamánnerievttis lea dievaslaš gelbbolašvuohta, lohká Høviskeland.

 

Biddjon 15 beaivvi diggái

Vuosttaš beaivvit dikkis leat mannan álggaheapmái gos sihke áktor ja bealušteaddjit leat válddáhallan ášši.

Dan vahkkus galgaba áššáskuhtton dievddut addit iežaska čilgehusaid lágamánnerievttis.

Diggi leage Romssas dán vahkku ja boahtte vahkku sirdojuvvo Detnui, gos vihtanat galget addit iežaset čilgehusaid, ja fas dan maŋŋel Romsii gos loahpahuvvo geassemánu 28. beaivvi.

 

 

 

 

-Almmuhus-