Veahtinfitnodagat eai einnos Jon Henrik Fjällgren ja Aninia vuoitit otná oassegilvvu Ruoŧa Melodifestivalenis, muhto jáhkket goalmmat sadjái boahtit.
Veahtinfitnodagat eai einnos Jon Henrik Fjällgren ja Aninia vuoitit otná oassegilvvu Ruoŧa Melodifestivalenis, muhto jáhkket goalmmat sadjái boahtit.
John Henrik Fjällgren oassálastte otne Ruoŧa Melodifestivalena oassegilvui lávlagiin man namma lea «En värld full av strider», maid son ovdanbuktá ovttas Aniniain. Soai leaba mielde njealját oassegilvvus mii lágiduvvo Skiellehis otne eahkes.
Fjällgren lea nuppes searvame mielde Melodifestivalenii, ja ovddit háve, jagi 2015 searvvai son luđiin «Manne leam friije» gos bođii nuppi sadjái Melodifestivalen finálas.
Iešguđet veahtinfitnodagat eai einnos Jon Henrik Fjällgrena ja Aninia beassat njuolga finalii, muhto soai oažžuba oktiibuot goalmmádin buoremus oddsa guđa veahtinfitnodagas.
Veahttinfitnodagat Bet365, Bethard, Betsson, Ladbrokes,Paf ja Unibet addet 5,00 eanemus ja 2,60 oddsa sutnuide vuoitit. Buoremus oddsa lea ovddeš melodifestivalana ja gaskariikkalaš vuoittis Loreen, 1,15 eanemus ja 1,05 unnimus.
Oassegilvvus leat čieža artista mielde ja guokte buoremusa beassaba njuolga finálii, ja goalmmát ja njealját sadji oažžu ges «andra chansen», mii lea nubbi vejolašvuohta beassat finálii. «Andra chansen» oasis jáhkket ges veahtinfitnodagat Fjällgren ja Aninia guoktá boahtit nubbin.
Jon Henrik Fjällgren lea leamaš jávkosis maŋŋel 2015 melodifesivalena ja muitala SVT Sápmái ahte lea leamaš eanas ealu luhtte ja lei maid ožžon postraumatisk streassa. Dál lea son dearvašeappo, ja beroškeahttá movt manná Melodifestivalenis, de lea son addime olggos ođđa skearru. Dat ilbmá njukčamánu goalmmát beaivvi.
