Heiafestivála, man áigo fas ealáskahttit dan geasi, ii meinestuvvon dattetge. Dál lohká festiválajođiheaddji ahte lea jurddašan maŋidit ealáskahttima boahtte jahkái, muhto ii duostta vel lohpidit maidege. Heiafestivála sáhttá šaddat dušše čáppa muitun festiválaberošteddjiide.
Heiafestivála, man áigo fas ealáskahttit dan geasi, ii meinestuvvon dattetge. Dál lohká festiválajođiheaddji ahte lea jurddašan maŋidit ealáskahttima boahtte jahkái, muhto ii duostta vel lohpidit maidege. Heiafestivála sáhttá šaddat dušše čáppa muitun festiválaberošteddjiide.
Diibmá čálii Ávvir ahte Heiafestivála jođiheaddjis lei áigumuš ealáskahttit festivála fas 2015:s, muhto nu dađi bahábut ii šaddan. Váldováttisvuohta lea leamaš ekonomiija guhkit áigái, ii ge leat leamaš dilli ge dasa.
– Mis stivrras ii leat njulgestaga oba leamaš ge áigi ealáskahttit festivála vaikko lei dan birra hupmu diibmá. Dán jagi goit ii šatta festivála, dan gal duosttan lohpidit. Muhto mii boahtte jagi dáhpáhuvvá, dan ferte oaidnit, muitala festiválajođiheaddji Jarle Trulsen.
Ii leat gánnáhahtti
2012:a lágiduvvui maŋemus Heiafestivála ja dalle čuožžiliige festivála stuorámus ekonomalaš váttisvuohta go festiválajođiheaddji šattai iežat lummas rokkastit váile ruđa.
– Munnje gal ii leat leamaš oba gánnáhahtti ge lágidit dán festivála go lean iežan ruhtaburssas šaddan rokkastit 85 000 ruvnno maŋemuš festivála maŋŋá. Mii oaččuimet moadde evrre Sámedikkis ja fylkkas, muhto eat leat goasse ožžon buollán evrre ge suohkanis. Dušše sihkarvuođabalvvat mákset 230 000 ruvnno, dat ii leat hálbi. Go galgá festivála lágidit de ferte goit badjelaš miljovdna mainna buvttada, čilge son.
II RUHTA, II GE DILLI: Festiválajođiheaddji Jarle Trulsen
mielas lea dieđusge šállošahtti go ná lea šaddan festiválain.
Ohcalit festivála
Festiválajođiheaddji mielas lea dieđusge šállošahtti go ná lea šaddan festiválain ja muitala ahte álbmogis lea ain stuora beroštupmi festiválii ja sii ohcalit dan.
– Munnje leat máŋggas riŋget ja sádden teakstadieđu gullan dihte movt festiválain manná, šaddá go fas vai ii. Olbmot váillahit festivála, dat čájeha ahte mii leat go bargan juoidá riekta go olbmot váillahit festivála. Mun lean hirbmat rámis dainna festiválain, ja lei somá lágidit festivála dalle go doaimmai bures. Muhto mun doaivvun ahte ferten beare dovddastit dál ahte ii doaimma šat nu go livččii galgan, lohka Trulsen.
Mearridit čakčamánus
Festiválajođiheaddji goitge ii loga iežas oalát vel vuollánan.
– Jus galgat fas lágidit festivála, de dat ferte šaddat boahtte jagi. Mun in leat vel áibbas mearridan, muhto jurdda lea rievdadastit konseapta, muhtimat stivrras galget olggos ja muhtimat sisa. Lea ollu plánen ja jurddašeapmi jus galgá fas ealáskahttit festivála, muhto mun doaivvun ahte šaddá lossadin fas oažžut festivála johtui, čilge son. Leat ollu festiválat mat lea heaittihuvvon Romssa fylkkas, ja dan lohká festiválajođiheaddji ahte das sáhttá buorre váikkuhus Heiafestiválii.
– Lea diehttelas ahte lea álkit lágidit festivála go eai leat nu ollu eará festiválat birra. Čakčamánus mii mearridit šaddá go festivála boahtte jagi vai ii, lohká Trulsen vel loahpas.
