-Almmuhus-
-Almmuhus-
-Almmuhus-
OĐĐASAT– Eai duostta gáržžidit

– Eai duostta gáržžidit

-

-

Deanučázádagaga Guolástanhálddahus lea gieđahallamin ášši ođđa rievdadusaid ektui, gos bohttet iešguđet oaivilat dievasčoahkkima ovcci lahttu gaskas.

Kárášjoga gieldda nubbi ovddasteaddji Nils Nilsen Gaup buvttii čielga oaivila čoahkkimis, ahte juoga ferte dahkkot. 

 – Sátni kultuvra ja árbevearru lea juoga maid buohkat njielastit ovttatmanu. Ja lea veadjemeahttun mis mearridit maidgege jus čađat galgat váldit vuhtii. Goabbá lea dehálabbot, kultuvra vuoi luossa, gažadii Gaup čoahkkimis.

Čoahkkimis lea garra digaštallan jođus ja Gaup ii loga jáhkkit hálddahusa duostat gáržžidit Deanučázádaga bivddu.

 – Dan gal jo gullá ahte eai oro duostamin ráddjet olles čázádagas, muhto oalgejogain gal áigot ráddjet, gos jo ii leat šat guolli, dadjá Gaup bottus, ovdal čoahkkin jotkkii gieđahallama.

 

Hárri vel báhccán

Seammás čujuhii son NRK dokumentára mii čájehuvvui maŋŋebárgga Deanujoga birra, ahte badjedeanu guolásteaddjit eai oba gullonge.

 – Vuolledeanushan gal lea guolli, gos dat vuolgá, muhto Kárášjoga ja Iešjoga siste ii gávdno šat measta eará go hárri, dadjá son.

Kárášjoga gieldda nubbi ovddasteaddji Elin Sandvik lea ovttaoaivilis Gaupan, ahte čoahkkin ii berre guldalit olbmuid oaivilii, muhto jurddašit baicce luosa birra.

Optimisttalaš

Mari Trosten oaivvildiiges ahte Norga berre vuordit Suoma oažžut mielde gáržžidemiide ja bivddii dálá njuolggadusaid doalahuvvot.

 – Mun gal lean nu optimisttalaš ahte mii oažžut suopmelaččaid mielde, dadjá son.

DG jođiheaddji Helge Samuelsen vástidii dasa ahte sii soitet šaddat vuordit viđas logi jahkái.

 – Mun in leat gal gearggus lihkahallat váldojoga, muhto oalgejogain sáhttit rievdadit njuolggadusaid, dadjá Samuelsen.

Ávvir čuovvu ášši viidáset.

-Almmuhus-