Kárášjoga mohtorsearvi lágida beassášlávvardaga «After-X» konseartta gos ii leat dohkálaš návddašit narkotihka dahje riidduid bivdit. Jus nu dahká, de biddjo olggos.
Kárášjoga mohtorsearvi lágida beassášlávvardaga «After-X» konseartta gos ii leat dohkálaš návddašit narkotihka dahje riidduid bivdit. Jus nu dahká, de biddjo olggos.
Beassášlávvardaga lágida Kárášjoga mohtorsearvi konseartta gosa vurdet 900 olbmo, ja dan oktavuođas leat almmuhan ahte sis leat golbma njuolggadusa. Jus daid rihkkot, de biddjo olmmoš olggos ja manaha konseartta. Vuosttaš čuokkis lea ahte narkotihka ii beasa návddašit, nubbi lea ahte ii leat lohpi návddašit alkohola mii ii leat oston lágideddjiin ja goalmmát čuokkis lea ahte riidduid bivdit ja doarrut lea dohkketmeahttun.
– Mii háliidat čájehit ahte mii vuosttaldat narkotihka, ja ahte leat áibbas dohkketmeahttun návddašit dan min doaluin. Seammás oaidnit dehálažžan ahte leat njuolggadusat mo olmmoš galgá láhttet ja ahte olbmot dihtet mii lea dohkálaš ja mii ii, čilge Kárášjoga mohtorsearvvi jođiheaddji Per Tommy Eideng njuolggadusaid birra.
Narkotihkkabeana
Kárášjoga mohtorsearvi lea almmuhan maid ahte sii leat bivdán narkotihkkabeatnaga finadit doaluin, muhto lea ain eahpesihkar boahtá go beana vai ii. Deanus lea narkotihkkabeana ja Kárášjoga leansmánne Kjell Magne Grønli ii hálit duođaštit boahtá go beana vai ii.
– Ii daga maidige ahte mohtorsearvi lea njuolggadusaid bidjan, ja dál aŋkke berrejit olbmot diehtit ahte sáhttet manahit konseartta jus rihkkot lágideddjiid njuolggadusaid. Lea buorre go searvi háliida čorgesvuođa, lohká Grønli.
Dárbu čielga njuolggadusaide
Per Tommy Eideng ii loga sis leamašan váttisvuođaid ovdal, muhto oidnet dárbbu ahte leat čielga njuolggadusat mat leat oidnosis álbmogii.
– Mis eai leat leamašan narkotihkkaváttisvuođat eará jagiid, muhto mii háliidat deattuhit ja čájehit ahte mii eat fuola narkotihka iežamet doaluide. Lea dehálaš ahte olbmot čuovvolit njuolggadusaid, muđuid biddjojit olggos, lohká Kárášjoga mohtorsearvvi jođiheaddji.
Mannan hui njuovžilit eará jagiid
Per Tommy Eideng deattuha ahte sin doalut ovddit jagiid leat mannan hui bures, eaige leamašan váttisvuođat doarrumiin dahje narkotihkain.
– Mis lea mannan hui njuovžilit eará jagiid, ii ge leamašan dárbu politiijaid veahkis. Sávan dat ain joatká nu, loahpaha son.
