Dáhkádusfitnodat háliida njulget boasttuipmárdusaid mat ain leat biilavuddjiin. Ii šatta dutnje gollun jus vuoját ealli njeaiga.
Dáhkádusfitnodat háliida njulget boasttuipmárdusaid mat ain leat biilavuddjiin. Ii šatta dutnje gollun jus vuoját ealli njeaiga.
Finnmárkkus vuojáhalle diibmá badjel 500 ealli johtolagas. Olu boanddat ja boazoeaiggádat vásihit ahte sin šibihat ja bohccot vuojáhallet luottaid alde, eai ge biilavuoddjit dieđit ášši. Eallit maid biidnahuvvet go lihkohisvuođat eai dieđihuvvo.
– Ollusat jáhkket sidjiide gártá gollun jus dieđihit vuojáhallamiid. Dat ii doala deaivása, dadjá Gjensidige dáhkádusfitnodaga gulahallanhoavda Pål Rune Eklo sierra preassadieđáhusas.
Juohkehaš lea geatnegahtton dieđihit vuojáhallamiid, ja lea maid lobiheapmi ja sáhttá ráŋggáštuvvot jus dušše guođđá lápmahuvvan dahje roasmmehuvvan elliid dieđitkeahttá.
– Ii leat masage ávkin guođđit elliid mat leat vuojáhallan. Ii šatta máksit iežasoasi dáhkádusfitnodahkii, ii ge masse bonusa jus dieđiha. Vahátmáksu šaddá áššin dušše boazoeaiggáda/ boandda ja dáhkádusfitnodaga gaskii. It dárbbaš iežat burssas máksit maidege, čilge Eklo.
Son ávžžuha dieđihit ášši lagamus šibitdállui, politiijaide dahje fuođđolávdegoddái.
– Jus ealli lea ruohtestan eret, merkes gokko vudjet dan njeaiga, vai lea álkit ohcagoahtit das, čállá son vel preassadieđáhusas.
