Guovdageainnu suohkanis galget leat vihtta ruvkevuorkká, muhto ii oktage dieđe gos dat leat.
Nordlándda Stáhtahalddašeaddji lea bivdán Guovdageainnu suohkanis dieđuid gos Biedjovákki ruvkebázahusvuorkkát leat.
Stáhtahalddašeaddji lea čohkkemin dieđuid Birasgáhttendirektoráhta fágasystemii.
Guovdageainnu suohkanis galget leat vihtta vuorkká Biedjovákki guovllus, ja Guovdageaidnu suohkan čállá Stáhtahálddašeaddjái ahte sii eai dieđe gos vuorkkát leat, makkár bázahusat leat vurkejuvvon ja man olu.
– Lea maid váttis dieđihit guđe áigodagas vuorkkát ledje anus. Maŋŋá go ruvkedoaibma heaittihuvvui, de visttit ja rusttegat čorgejuvvojedje eret. Lea dušše okta visti báhcán ja lea dego geađgemusea. Guovlu lea čorgejuvvon ja máhcahuvvon fas lundui, čállá Guovdageainnu suohkan reivves.
