-Almmuhus-
OĐĐASATEai dieđe gos dávda lea boahtán

Eai dieđe gos dávda lea boahtán

-

-

Lea eahpečielggas movt priordávda Chronic Wasting Disease (CWD)  lea njommon golmma sarvvaeallái mannan giđa. Dat boahtá ovdan riskaárvvoštallanraporttas man Biebmobearráigeahčču lea ožžon CWD birra Biebmooadjebasvuođa Dieđalávdegottis.

Chronic Wasting Disease (CWD)

Chronic Wasting Disease (CWD) falleha guovddášfierpmi eallis ja bilida vuoiŋŋamaččaid nearvaseallaid.

 

Dávda leavvá gulul ja loahpas ruoidná ealli ja láhttenvuohki rievdá ovdal go jápmá.

 

Veterinearainstituhtta bivdá olbmuid dieđihit sidjiide jus oidnet gottiid mat eai leat dearvašat.

 

Norggas leat geassemánu rádjái golmma eallis duođaštuvvon CWD dávda, ovtta gottis Lærdalas ja guovtti ealggas Trøndelágas.

 

Gáldu: Norgga Veterinearainstituhtta

Raporttas boahtá ovdan ahte CWD ii leat stuora áitta olbmuide, muhto sáhttá hui duođalaš Norgga sarvvaelliide.

– Dál lea dehálaš kártet sarvvaelliid nu jođánit go vejolaš vai gávnnahit man viidát dávda lea lávdan, lohká Biebmobearráigeahču seniorráđđeaddi Siri Løtvedt.

 

Loga maid: Ballet njoammudávdda buktit roasu

 

Sáhttá leamaš Norggas

Biebmooadjebasvuođa Dieđalávdegotti raporttas celko aht eai dieđe gos dávda lea boahtán Norgii.

Dávda sáhttá čuožžilit fáhkka, vaikko ii leat goassige čájehuvvon.

Njoammuávdnasat sáhttet boahtán olgoriikkas, ja dávda sáhttá maid leamaš Norggas guhkit áiggi, muhto nu unna mearáš ahte ii leat fuomášuvvon.

 

Duođalaš

Raporta addá buori vuođu bidjat johtui rievttes doaimmaid.

Veterinearainstituhtas lea mihttun hehttet dávdda njoammumis, ja raportta dieđut addet vuođu olahit dan.

– Gávdnosat dán dávddas Norggas leat duođalaččat. Dávda njoammu hui álkit sarvvaelliid gaskka ja leat stuora váikkuhusat jus lávdá. Okta ávžžuhusain raporttas lea kártet man viidát gávdno dávda, ja dainna leat bargagoahtán, muitala Løtvedt.

 

Ii sáhte dikšut

Løtvedt lohká jus ovdamearkka dihte bohccot ožžot dávdda, de fertejit dasto gávnnahit makkár doaimmaid bidjet johtui, ja man viidát lea njommon.

– Lea duođalaš eallái mii oažžu dávdda go dan ii leat vejolaš dikšut ja ealli jápmá dainna.

 

Evttohan gildosiid

Biebmobearráigeahčču lea maid evttohan láhkaásahusa hehtten dihte CWD njoammuma.

Sii evttohit gildosa sarvvaelliid geaseheames nuppi riikii.

Eará doaimmat maid evttohit leat lohpegáibádusa ovdal go sirdá sarvvaelliid fylkkaid gaska, gildosa hájaávdnasiidda mat bohtet sarvvaelliin, gildosa bidjat fuođđara ja njoallungeđggiid ja viiddiduvvon dieđihangeatnegasvuođa sarvvaelliid eaiggádiidda.

 

 

 

 

 

-Almmuhus-