Vaikke boazodoallit leat Finnmárkku stuorimus eanangeavaheaddjit, de ii lean oktage boazodoalu ovddasteaddji bovdejuvvon sáhkavurrui FeFo 10-jagi ávvudeamis.
Vaikke boazodoallit leat Finnmárkku stuorimus eanangeavaheaddjit, de ii lean oktage boazodoalu ovddasteaddji bovdejuvvon sáhkavurrui FeFo 10-jagi ávvudeamis.
Mannan bearjadaga lágidii FeFo konferánssa iežaset 10-jagi ávvudeami oktavuođas, man gohčodedje «geaidnu viidáseappot».
Dohko ledje bovden 18 ásahusa, searvvi ja ámmátolbmuid doallat sáhkavuoruid. Vaikke boazodoallu lea geavaheaddji visot FeFo eatnamiin Finnmárkkus, de liikká eai lean bovdejuvvon konferánsii sáhkavuoru doallat.
Ártet
Guovdageainnu doaibmi sátnejođiheaddji ja boazodoalli, Anders S. Buljo, gii ieš oassálasttii konferánssas, imaštallá juste dan go ii okta ge boazodoalloovddasteaddji lean bovdejuvvon sáhkavurrui.
– Mu mielas gal lea dat oba ártet. Vaikke boazodoallit atnet visot FeFo eatnamiid Finnmárkkus, mii lea 95 proseantta olles Finnmárkkus, de eai lean doarvái dehálaččat bovdejuvvot sáhkavuoru doallat, lohká son.
FeFo preassagovva: Jan Henrik Hætta
Eai bovdejuvvon
FeFo gulahallan- ja birasoktavuođajođiheaddji, Eirik Palm, duođašta ahte eai lean bovden boazodoalloovddasteddjiid sáhkavurrui.
– Dat doallá deaivása ahte boazodoalloovddasteaddjit, nu go Norgga Boazosápmelaččaid Riikkasearvi (NBR), eai lean bovdejuvvon sáhkavurrui, muhto NBR lei bovdejuvvon oassálastit, muitala son.
– Mis ii lean sadji buohkaide geaid háliideimmet doallat sáhkavuoru. Mii eat lean eará ealáhusservviid ge bovden, muitala Palm.
Eat garvve moaitagiid
Palm čilge Ávvirii ahte sii ledje bovden olbmuid geat sáhttet muitalit FeFo birra, movt ásahuvvui, ja makkár hástalusat leat leamaš, njuolggut sin geain lea leamašan dehálaš rolla FeFo ásaheamis.
– Mii eat garvve gal dakkáriid geat min moitet, ja mii oaččuimet maid moaitagiid konferánssas sis geain lei sátnevuorru, ja dan gulle buohkat. Mii váldit moaitagiid buriin váimmuin vuostá, go de lea mis vejolaš maid čehpebut hálddašit Finnmárkku, lohká son.
Govven: Nils Johan Vars (vuorkágovva)
Garván sámi ulbmiliid
Sámi bivdo- ja meahcástansearvvi ovdaolmmoš, Johan Ingvald Hætta, moaitá maid FeFo go sii eai lean bovdejuvvon sáhkavurrui.
– Na dan dáfus goit gal go Norgga bivdo- ja guolástansearvi lei bovdejuvvon doallat sáhkavuoru, ja dan dáfus livččen mun maid vuordán ahte min bovdejit logaldallat sámi bivdoberoštumiid ja vieruid birra. Finnmárkkulága ulbmilparagráfas han daddjo ahte sámi beroštumiid galget erenoamážit váldit vuhtii hálddašeamis, lohká Hætta Ávvirii.
– Mii leat gullan moaitagiid, ja mii bargat daid ektui boahtteáiggis, lohká Eirik Palm Ávvirii vel loahpas.
