-Almmuhus-
OĐĐASATEai beasa šat riŋget čiegus nummirin

Eai beasa šat riŋget čiegus nummirin

-

-

Fitnodagat mat vuvdet gálvvuid eai šat beasa riŋget čiegus nummiriin olbmuide. Dát galgá hehttet vuvdiid vuorjamis olbmuid, geat leat várren iežaset telefonvuovdima vuostá.

Vaikke olbmot leat várren iežaset telefonnummiriid telefonvuovdima vuostá, de dattetge vásihit oallugat ahte fitnodagat riŋgejit ja vuovdalit gálvvuid.

Ráđđehus lea dál čavgen njuolggadusaid.

 

Gildet čiegus nummiriid

Telefonvuovdima oktavuođas ii leat šat lohpi geavahit čiegus nummira ja buot telefonnummirat mat geavahuvvojit telefonvuovdima olis fertejit registrerejuvvot.

Olbmuin galgá vejolaš ohcat telefonnummiriid ja dákko bokte oažžut dieđu ahte nummir geavahuvvo vuovdima oktavuođas.

– Olbmuide šaddá álkit suddjet iežaset telefonvuovdima vuostá ja geavaheddjiidbearráigeahčus šaddá álkit čuovvolit váidagiid, lohká geavaheddjiidministtar Solveig Horne preassadieđáhusas.

 

Váddáseappot oažžut lobi

Ođđa njuolggadusat dagahit maiddái ahte ealáhusdolliide šaddá váddáseappot oažžut lobi riŋget geavaheddjiide.

Dál ii beasa šat okta ealáhusdoalli bivdit riŋgenlobi máŋgga fitnodaga ovddas.

Dasa lassin eai beasa eaktodáhtolaš organisašuvnnat šat sáddet jearaldaga ekonomalaš doarjaga ovddas jus dáid sáhttá dulkot bákkolaš máksimin.

Ovdamearkka dihtii ii leat šat lohpi sáddet rehkegiid maidda leat čállán ruhtasubmi, kontonummira ja máksináigemeari.

-Almmuhus-