Cuoŋománu 1.beivvi lei 54 siidaoasis áigemearri unnidit boazologu. Eanandoallodirektoráhtas eai jáhke boazodolliid njuovvan doarvái, ja plánegohtet dál ođđa ráŋggáštusaid sidjiide.
Dan oktavuođas go eanandoallodirektoráhtta boazodoalloossodat lea fárren ođđa vissui, ja go odne lea vel áigemearri buot siidaosiide sáddet boazodoallodieđáhusa eiseválddiide, ledje sii bovden preassadeaivvadeapmái Áltái.
Eai vuos logut
Cuoŋománu 1.beaivvi manai áigemearri vel dan maŋemus 54 siidaoassái. Čakčamánus čilget dasto boazologut main oaidná man muddui sii leat jeagadan njuovvat. Jagi áigi lei ain birrasiid 20.000 eambbo boazu Finnmárkkus go leat mearridan lobálažžan.
Galget dovdot
Eanandoallodirektoráhta boazodoalloossodaga direktevra Magnar Evertsen lohká sin álgán plánet movt ráŋggáštit sin geat eai leat olahan mearriduvvon boazologu.
– Mii leat bargame oažžut daid sadjái, ja mis leat ain moadde mánu. De oaidnit movt ráŋggáštusmávssuid galgá hukset, sturrodagaid ja nu ain. Dat mii lea dehálaš sáhkuiguin, lea ahte dat galget biddjot nu ahte eai šatta nu stuorrát ahte leat ráŋggáštussan, muhto seammás galget leat dan mađe garrasat ahte čuovvu gáibádusa, dadjá Evertsen.
Ruhtaburssa mielde
Boazodoalloeiseválddit leat diibmá sádden muhtin siidaosiide dieđu bággomávssuid birra. Muhto dat rehkenastinvuogit eai galgga šat adnot.
– Dien mii gal heivehit vehá. Sáhkut galget rehkenastot juohke boazoeaiggáda iežas ekonomiija mielde. Eai šatta seamma stuora sáhkut buohkaide. Ja lea gullon ahte leat miljovnna ruvdnosaš sáhkut, muhto dan gal eahpidan ahte nie stuorisin šaddet, dadjá Evertsen.
Báhkka ášši
Zorro vuođđudus, masa čuđiid mielde boazodoallit leat searvan vuosttaldit unnidanproseassaid, čájeha goitge boazodoalloeiseválddiide ahte lea vuosteháhku unnidanproseassaide. Dan mieđiha Evertsen.
– Mii hálddahusas váldit vuhtii ahte mii leat riekteservodat, ja lea áibbas dohkálaš ahte mearrádusaid geahččala duopmostuoluid. Mii rehkenastit goit ahte fertet ráŋggáštusaid váldit atnui čavčča rájes. Stáda lea gohččon min ráŋggáštit sin geain lea eambbo boazu go lea mearriduvvon.
Áiggoše addit ovddasvástádusa
Eanandoallodirektoráhtas lea siskkáldas kontrolla ja iešmearrideami boazodoalus mihttun boahtteáiggis. Sii áiggoše boazodoallošiehtadusa bokte nannet ealáhusa máhtu hábmet iešmearrideami, ja maid ásahit iešguđet ortnegiid mat dagaše dan vejolažžan. Dasa lea biddjon 1 miljon ruvdno.
– Ávžžuhan juohke áidna boazodoalli jurddašit guđe guvlui áigot boahtteáiggis, galggašedje ođđasit álgit doaibmanjuolggadusaid hábmet. Ii stádas leat beroštupmi stivret detálljaid jus ožžot ealáhusa ieža sihkkarastit ceavzilis ealáhusa, dadjá Evertsen.
Evertsen ii loga unnideami leat veadjemeahttumin, muhto gáibideaddji gal lea.
– Muhto dál leage dehálaš ahte oažžut siskkáldas ságastallama buot orohagaide boazologu birra, go de sáhttet orohagain áiggi mielde iešguđet siidaoassái ieža mearridit sierra boazologu, dadjá son.
Áššis sáhtát eanet lohkat báberáviissas.
