Eahpesihkar gii šaddá Álttá sátnejođiheaddjin

Bargiidbellodaga (Bb) sátnejođiheaddjeevttohas Monica Nielsen lei sávvan ahte galget nagodit ovtta dahje guokte mandáhta vel fasket. Sii ožžo 11 mandáhta dan botta go sin ovttasbargobellodat Sosialisttalaš Gurutbellodat (GB) oaččui 3 mandáhta.

 – Dát ii doala eanetlohkui, ja mii fertet geahčadit maid mii galgat dahkat. Leat dál čoahkkanan digaštallat ášši, muhto lea čielggas vaikke mo manaš, de mii geavahit návccaid ahte min politihkka galgá lihkostuvvat, dadjá Nielsen.

Háliida stullui

Ovddádusbellodat (OvdB) leige válgavuoiti ovttas Gurutbellodagain dán jagi. OvdB oaččui čieža mandáhta, mii mearkkaša ahte sis leat golbma eanet áirasa mannan válgga ektui. Berg lohká iežas hui duhtavažžan, muhto lei sávvan nagodit vel ovtta áirasa fidnet. Dađi bahábut son morašta go OvdB ovttasbargobellodagat eai lihkostuvvan.

 – Sihke Riddobellodat ja Olgešbellodat dahke heajos válgga, mii ii leat buorre. Sii masse guokte ja guhtta mandáhta. Fertet dál geahčastit eará bellodagaide. Ovdamearkka dihte Gurutbellodahkii, go mihttu lea sátnejođiheaddji stullui beassat, dadjá Berg.

Gurut trumfan

Gurutbellodat lei maiddái dán jagáš vuoiti. Sii sihkkaraste 12 proseantta jienain ja leat 4 mandáhta dál, ovtta ovddas. Leat sii geat šaddet trumfakoartan dán jagi. Gurutbellodaga sátnejođiheaddjeevttohus Trine Noodt iluin muitala sii eai atte sátnejođiheaddji stuolu geasege nuvttá.

 – Leat lohkan jienasteddjiide ahte háliidat sátnejođiheaddji stullui ieža. Lea mihttu dat, dadjá Noodt ja joatká:

 – Leage dál go duođalaš barggut álget, ja lea váttis diehtit man guvlui mii mieiggastit, eat atte maidege nuvttá. Fertet das viidásat oaidnit mii geavvá, dadjá Noodt.

Eai luoitte OvdB stullui

Sosialisttalaš Gurutbellodat oaččui golbma mandáhta, ja Tommy Berg sávai njeallje. Dáinna son ferte duhtat ja muitala NRK:i ahte ii leat maŋimuš sátni vel daddjon. Soaitá son šaddat sátnejođiheaddjin, jus ii, de galgá leat čielggas ahte eai atte doarjaga Ovddádusbellodahkii.

Vuoittáhallit

Válgga vuoittáhalli Olgešbellodat (Ob) massii guhtta mandáhta. Sátnejođiheaddjeevttohus Ivar Pettersen muitala Ávvirii ahte sii leat beahtahallan, muhto áddejit bures ahte sii fertejit geahčadit maid leat boastut dahkan.

 – Jáhkán nu go buohcciviesu ášši, mii lea dagahan ahte leat válgga vuoittáhallit, muhto dát ii leat go okta ášši. Fertet čoahkkanit ja digaštallat dáid beliid, dadjá Pettersen.

Bohtosat:

Bb 30,6 % (+1,6 %)

OvdB 20,8 % (+9,3 %)

Gb 12,3 % (+4,8 %)

Ob 11,1 (-15,9 %)

SG 9,6 % (+2%)

Rb 4,9 % (-5,3 %)

KáB 4,5 % (+ 0,4 %)

Mdg 3,6 % (+3,6 %)

GB 2,0 % (+0,2 %)

Kri 0,6 % (+0,6 %)