Sámi Dáiddačehpiid Searvvi (SDS) jahkečoahkkin ovddidii lávvardaga eahpeluohttámuša Sámi Dáiddaguovddáža (SDG) stivrajođiheaddjái Trond Nilsenii ja leat ávžžuhan su guođđit virggis. Muhto SDS ii háliit vuos čilget siva dasa.
Sámi Dáiddačehpiid Searvvi (SDS) jahkečoahkkin ovddidii lávvardaga eahpeluohttámuša Sámi Dáiddaguovddáža (SDG) stivrajođiheaddjái Trond Nilsenii ja leat ávžžuhan su guođđit virggis. Muhto SDS ii háliit vuos čilget siva dasa.
Sámi Dáiddačehpiid Searvvis (SDS) lei jahkečoahkkin lávvardaga, gos Sámi Dáiddáguovddáža (SDG) stivrajođiheaddjái Trond Nilsenii ovddiduvvui eahpeluohttámuš ja ávžžuhit su guođđit virggis. Son lea válljejuvvon guovtti jahkái, muhto beassá joatkit jus ii geassát. Su sadjái evttohii jahkečoahkkin jáhkovuotnalačča Anne Lise Josefsena.
Ođđa jođiheaddji
Maiddái SDS oaččui jođiheaddji jahkečoahkkimis, Hege Annestad Nilsena, gii lávkii Marita Isobel Solberga sadjái, gii lei válggas, muhto ii ožžon ođđa luohttámuša.
Njuolggadusain čuožžu ahte jahkečoahkkin, mii lea SDS bajimuš orgána, vállje áirasiid SDG:s stivrii oktan stivrajođiheddjiin, nubbijođiheddjiin ja jođiheddjiin Dáiddalaš Ráđđái.
Eai sáhte bálkestit
Hege Annestad Nilsen lea ovdal jođihan sihke SDS ja SDG, nu ahte dovdá goappaš vuogádagaid bures.
– Min jahkečoahkkinčálli lea sádden Nilsenii mearrádusa sotnabeaivvi ja mii háliideimmet vuordit ášši almmuhemiin, dassá go son lea beassan vástidit, čilge Nilsen.
Ođđa jođiheaddji čilge Trond Nilsena válljejuvvon guovtti jahkái ja sáhttá joatkit jus ii vállje geassádit virggistis.
– Jahkečoahkkin mearridii ovddidit eahpeluohttámuša, muhto mii eat sáhte bálkestit geange olggos, go lea vuođđudusa birra sáhka ja de lea vuođđudusláhka mii lea fámus, čilge son.
Jávoheapme
Jođiheaddji lea goittot hui jávoheapme siva ektui, manin eahpeluohttámuš lea ovddiduvvon.
– Leat leamaš áššit mat leat dagahan ráfehisvuođa Dáiddaguovddážis. Mii eat leat ovddidan eahpeluohttámuša vuogi dihte, mo son lea hálddašan daid riidoáššiid, deattuha Hege Annestad Nilsen.
Ii dieđe siva
Trond Nilsen ii loga diehtit siva eahpeluohttámuššii.
– Mun in dieđe inge ádde mii lea geavvan, inge leat ožžon dieđuid čoahkkima birra, nu ahte in sáhte kommenteret nu ollu, dadjá Nilsen Ávvirii.
Ášši birra beasat eanet lohkat ihttá bábiráviissas.
