-Almmuhus-
-Almmuhus-
-Almmuhus-
KULTUVRAEahpečielggas mo Sámi oasseváldi galgá válljejuvvot Liet-gilvui

Eahpečielggas mo Sámi oasseváldi galgá válljejuvvot Liet-gilvui

-

-

Hástalus lea čuožžilan go Liet International ii šat lágiduvvo go juohke nuppi jagi. Lea Sámi Grand Prix vuoiti gii juohke jagi lea beassan Sámi ovddastit riikkaidgaskasaš musihkkagilvvus. Dál lea eahpečielggas gii galgá searvat, go leat guokte SGP vuoiti gártan juohke Liet International gilvui.

2006 rájes lea Sámi Grand Prix lávlunoasi vuoitit ožžon fálaldaga searvat Liet International musihkkagilvui, ja leat maid searvan eanaš jagiid.

Dál lea mearriduvvon ahte boahtte jagi rájes galgá Liet International gilvu lágiduvvot dušše juohke nuppi jagi.

Dasto šaddá eahpečielggasin goappá jagi vuoiti beassá searvat Liet International gilvui.

 

Eai vel digaštallan ášši


BUVTTADEADDJI: Sámi Musihkkafestivála ii leat vuos gávnnahan movt áigot čoavdit dán boahtteáiggis, muitala Ol Johan Gaup. Vuorkágovva: Inga Marie Guttorm

Sámi Musihkkafestivála ii leat vel digaštallan movt áigot čoavdit ášši. Dan muitala buvttadeaddji Ol Johan Gaup.

– Eat leat vuos áibbas sihkkarat movt čoavdit ášši, jus mii bidjat dan jagi vuoiti, vai vuorbádit go guovtti vuoiti gaskkas, vai galgat go jienastit. Dá lea ášši maid fertet ságastallat dál, lohká Gaup.

Sámi Musihkkafestivála stivrajođiheaddji Ellen J. Sara Eira lohká sin áigumuš lea ahte goappaš oasseváldit beassaba searvat riikkaidgaskasaš gilvui.

– Dát šaddá váttisvuohtan midjiide. Dát lea vuos nu ođas, eat leat vel jearran movt áigot dan hástalusa čoavdit, go mii háliidit juohke jagi vuoiti gilvui.

 

Sáddejit eará festiválii

Liet International gulahallanolmmoš Tjallien Kalsbeek čilge sis lea seamma váttisvuohta Frieslánddas.

Liet lea Frieslándda báikkálaš gilvu, ja Liet International lea fas riikkaidgaskasaš gilvu, masa miehtá Eurohpá unnitálbmotgielaid musihkkarat servet.

– Mii leat mearridan čoavdit dán dainna vugiin ahte daid jagiid go ii leat Liet International, de mii sáddet vuoiti eará musihkkafestiválii Eurohpás. Dainna lágiin ovdanbuktit min gilvvu vuoiti ja oažžut su máilbmái, lohká Kalsbeek.

 


SEAMMA VÁTTISVUOHTA: Liet International gulahallanolmmoš Tjallien Kalsbeek čilge sis lea seamma váttisvuohta iežaset báikkálaš gilvvuid dáfus. Vuorkágovva: Ovlla Gaup

Kalsbeek čilge sii leat árvvoštallan, ja gávnnahan nu lea buoremus čoavddus sidjiide.

– Sáhtášii buorre čoavddus maiddái Sámi Musihkkafestiválii, muhto in hálit gal dasa seaguhit. Lea juoga maid mii leat gávnnahan, lea buorre liigevuoitu min vuoitái, lohká son.

Oasseváldiid gal eai áiggo lasihit vaikko dákkár hástalus lea čuožžilan.

– Dat soaitá juoga maid sáhttit boahtteáiggis geahččat, muhto lea nu ahte juohke unnitálbmoga giellaguovllus galgá dušše okta oasseváldi. Oaidnit Eurovisionas lea maid dušše okta oasseváldi juohke riikkas. In áiggo lohkat ahte ii šatta goasse nu, muhto ii dáidde, lohká Kalsbeek.

 

Liet International 2017 Oasseváldit

Sápmi:

Ella Marie Hætta Isaksen

 

Baskhir:

Zaman

 

Breton:

Ukan

 

Skottlándda gaelic:

Mary Ann

 

Spanan Tongo:

Ruben Semmoh

 

Friesland:

Aafke Zuidersma

 

Lëtzebuergesch:

La Schlapp sauvage

 

Udmurt:

Nikita Ilyin & Dmitry Yakimov

Váilevaš ruhtadeapmi ággan

Liet International gulahallanolmmoš čilge váilevaš ruhtadeapmi lea ággan manne leat válljen dušše juohke nuppi jagi lágidit gilvvu.

Liet International lea leamaš johtti gilvu, ja lea lágiduvvon iešguđet báikkiin gos leat unnitálbmotgielat, earret eará Ruoŧas, Frankriikkas ja Itálias.

Dás rájes galgá maid gilvu aivve leat Frieslánddas, Vuolleriikkas.

– Lea váttis iešguđet internašunála ovttasbargoguimmiiguin lágidit dákkár doaluid. Váttis maiddái gávdnat ruhtadeddjiid, go fertejit doarjagat. Soaitá álkit oažžut ruhtadeami jus juohke jagi lágidit gilvvu Frieslánddas, muhto dan eat vel dieđe.

 

Ii váivašuva go ii beassan mielde

Maŋemuš go Liet International gilvu lágiduvvui, lei 2014:s, Duiskkas. Dalle lei Sámi Grand Prix 2014 vuoiti, Aila-duo, mielde gilvvus. Soai bođiiga nubbin.

Dán jagi ovddasta Ella Marie Hætta Isaksen Sámi, diimmá Sámi Grand Prix lávlunoasi vuoiti.

2015 vuoiti Nils Henrik Buljo ii beassan de searvat Liet International gilvui.

– Mun in váivašuva dainna gal, mu mielas lea áibbas buorre, lei son gii vuittii maŋemuš. Go gilvu han ii lágiduvvo go juohke nuppi jagi, dadjá Buljo.

-Almmuhus-