-Almmuhus-
OĐĐASAT– Eadni ii láven suovvat juoigat, muhto mun in jeagadan

– Eadni ii láven suovvat juoigat, muhto mun in jeagadan

-

-

Vaikke son lea šikkohallan nuorran go juoiggai, de son liikká seailluhii luođi seammás go oahpahii luohteárbbi sihke iežas niidii ja áhkkubii.

Dán vahkku lágidii Sámi musihkkaakademiija seminára árbevirolaš sámi vokálamusihkkašlájaid birra Sámi allaskuvllas Guovdageainnus, gos earret eará árbevirolaš luohti lei guovddážis. 

Seminárii serve maid golmma buolvva juoigit. 


Golmma buolvva juoigit juiget ja juogadit árbevirolaš luđiid Sámi allaskuvllas mannan duorastaga.
Govven: Leila Kristine Vasara

 

Šikkohallan

Sii leat ovttaládje seailluhan árbevirolaš luođi, vaikke ii lean álot liikká álki. 

Boarrásepmosa, áhku Berit Karen Gaino áiggis, ii lean lohpi juoigat almmolaččat, ja son šikkohalai juoigamis ruovttus, dadjá son logaldallamis ja joatká;

– Mun in jeagadan, Ledjen nu garas dainna ahte luohti galggai seailut. Ledjen nu ceaggái ahte juigen ruovttus, ja nu lea sihke mu nieida ja mu áhkkut dolvon viidáseappot dan árbemáhttu.

 

Buolvvas bulvii

Inger Marie Nilut, gii lea váldán dološ luohteárbbi viidáseappot, oaivvilda mávssolažžan ja divrrasin oahpahit dološ luđiid ja maiddái oahppat ođđa. 

– Ulbmil livččii sámi stuora luohteárbbi áimmohuššat boahtte buolvvaide. Boahttevaš buolvvat han maid galggaše beassat váldit vuođu dáin luđiin main mii leat beassan váldit vuođu, lohká son. 


Inger Marie Nilut
Govven: Leila Kristine Vasara

Luohti, ambassadevra 

Eadni Berit Karen Gaino lohká unnán árgabeaivválaš juoigama gulat lagas birrásis, seammás go rávve olbmuid juoigat ruovttuin vai seaillušii luohteárbbi. 

Son jáhkká risttalašvuođa dáruiduhttima leavvan lea gáidadan luođi čihkosii, ja lohká: 

– Ii han dovdduid ja ilolašvuođa leat suddu juogadit. 

Su nieida Inger Marie Nilut lea ovttaoaivilis ja lasiha: 

– Munnje mearkkaša luohti movtta, dovdduid ja ráhkisvuođa, ja jáhkán luođi buori ávnnasin nannet mánáid ja nuoraid identitehta ja gullevašvuođa.

 – Juoigan ruovttuin han lea buoremus vuohki seailluhit dan, vástida eadni Berit Karen Gaino. 

 


Sara Karen Anne Nilut.
Govven: Leila Kristine Vasara

Identitehta ja gullevašvuohta 

Áhkkut Sara Karen Anne Nilut, geas luohti lea hui sadjosis, mieđiha luođi váilevašvuođa nuoraid gaskkas ja lohká: 

– Go mun stuorrulin, de han mun easka ipmirdišgohten luođi váilevašvuođa ruovttuin. Luohti han sáhttá leat vuohki mo gulahallat seammás go sáhttá dilálašvuođa loktet. Luohti sáhttá maid vuohki nu mo ovdamearkka dihte dovdduid čájehit, morraša, váillaheami ja movtta. 

– Luohti lea hui stuora oassi mu identitehtas, loahpaha son. 

-Almmuhus-